Ditën e sotme janë hapur aplikimet për Lotarinë Amerikane, për të gjithë shqiptarët.
Lajmi është bërë i ditur nga Ambasada Amerikane në Shqipëri, ku njoftohet se të gjithë shqiptarët që duan të realizojnë ëndrrën amerikane kanë një muaj kohë për të aplikuar dhe provuar fatin e tyre. Aplikimet do jenë të hapura deri më 7 nëntor, në orën 12:00.
“Programi DV-2025: Periudha e regjistrimit në internet për Programin DV-2025 fillon të mërkurën, 4 tetor 2023, në orën 12:00 të mesditës, Koha Lindore e Ditës (EDT) (GMT-4) dhe përfundon të martën, më 7 nëntor, 2023, në orën 12:00 të mesditës, Koha Standarde Lindore (EST) (GMT-5). Individët që paraqesin më shumë se një aplikim gjatë periudhës së regjistrimit do të skualifikohen”, thuhet në faqen zyrtare të ambasadës së SHBA në Tiranë.
Ndërkohë që qytetarët e interesuar mund të aplikojnë falas në https://dvprogram.state.gov
Ambasada thekson se të interesuarit duhet të jenë të pajisur me pasaportë , rregull ky që është futur në fuqi prej disa vitesh, pasi aplikimi nuk mund të bëhet vetëm me kartë identiteti.
