Një tragjedi ka ndodhur mesnatën e djeshme në Irak ku një dasmë me afro 300 të ftuar, është kthyer në tragjedi.
Sipas BBC, deri më tani raportohen rreth 100 viktima dhe 150 të tjerë të plagosur. Gjatë kohës që dasmorët ishin në kulmin e atmosferës, fishekzjarret që zakonisht përdoren për evente të tilla, mendohet të jenë shkaku i zjarrit të rënë në godinë.
Xixat e fishekzjarreve kanë prekur tavanin e ndërtesës e cila për shkak të materialit të ndërtimit me kosto të ulët, është përfshirë menjëherë nga flakët duke u rrëzuar në pak minuta.
Një dëshmitar që i shpëtoi ngjarjes, në një intervistë për mediat e huaja u shpreh se: “Ne pamë zjarrin që u ndez menjëherë, kush ia doli të vraponte, shpëtoi, por shumë të tjerë mbetën të bllokuar”.
Një tjetër i mbijetuar gjithashtu, tha se një anëtarë i familjes së tij ishte mes viktimave.
Po ashtu dyshohet se dhe nusja e dhëndri mund të jenë mes 100 personave të vdekur, por ende nuk është e konfirmuar.
Ndërkohë kryeministri i Irakut Mohammed Shia al-Sudani, tha se do të kryhen inspektime të ndërtesave dhe do të shqyrtohen procedurat e sigurisë, me “autoritetet përgjegjëse për çdo neglizhencë”.
Ai gjithashtu shpalli tre ditë zie kombëtare në nder të viktimave.
