Aktori i njohur amerikan, Thomas Haden Church nuk i ka bërë aspak përshtypje për mirë veprimi që Will Smith bëri kundrejt komedianit, Chris Rock.
Gjatë një interviste me Debatable në “SiriusXM Volume”, aktori ka bërë thirrje që Will të përjashtohet nga ceremonia e ndarjes së çmimeve “Oscar” dhe tha se ishte shumë i zhgënjyer prej tij.
“Unë mendoj se Will Smith duhet të ndalohet nga ‘Oscars’ për gjithë jetën,” u shpreh ai më 28 mars. “Unë mendoj se atij duhet t’i hiqet anëtarësimi i tij në Akademi, por nuk mendoj se ai duhet të humbas ‘Oscar’-in e tij.”
Thomas, i cili u nominua si “Aktori më i mirë në rol dytësor” në 2005-ën për interpretimin e tij në “Sideways”, shpjegoi se Will “në mënyrë legjitime” fitoi çmimin për aktorin më të mirë falë portretizimit të tij të Richard Williams.
Dhe ndonëse ai mbështet aktorin që të mbajë trofeun e tij, Thomas mendon se duhet të ketë disa pasoja.
Ai u shpreh se ka qenë në Akademi për 17 vjet dhe nuk ka parë asnjëherë të ndodh diçka e tillë.
Madje sipas tij, justifikimi se Smith e bëri veprimin nga dashuria për gruan e tij, ishte “mjaft patetike”.
Gjatë “Oscars 2022”, Will u ngjit në skenë dhe goditi komedianin Chris Rock pasi ai bëri një shaka për Jada Pinkett Smith.
