Mes sulmeve dhe bombardimeve të Rusisë ndaj Ukraniës prej disa ditësh, është diskutuar edhe këndvështrimi i Europës dhe se sa të gatshëm janë ata për të ndihmuar ukrainasit.
Kështu, presidentja e Komisionit Evropian, Ursula von der Leyen, është shprehur se ka siguruar presidentin ukrainas, Volodymyr Zelenksy se BE-ja do vazhdojë të mbështesë Ukrainën duke i mundësuar “me të gjitha mjetet që ka në dispozicion” për t’i ndihmuar gjatë luftës.
Gjatë një bisede telefonike mes Presidentes së KE-së dhe Zelensky-t, lajm që e bëri të ditur vetë Ursula von der Leyen në llogarinë e saj në “Tëitter”, është diskutuar për situatën në terren në Ukrainë dhe për ndihmat humanitare.
“Diskutova situatën në terren në Ukrainë me Presidentin Zelensky. BE-ja do të vazhdojë të mbështesë Ukrainën me të gjitha mjetet që ka në dispozicion, në koordinim të ngushtë me shtetet anëtare dhe partnerët tanë ndërkombëtarë”, ka shkruar ajo në rrjete sociale.
“Prioriteti i parë janë korridoret e sigurta humanitare”,- shtoi Presidentja.
Nga ana tjetër, është konfirmuar se edhe Bashkimi Evropian dëshiron që Ukraina të bëhet një shtet anëtar sa më shpejt të jetë e mundur, sipas komisionerit Maros Sefcovic këtë të premte.
“Është koha për të sinjalizuar se populli ukrainas është një nga popujt evropianë dhe ne duam që ata të hyjnë sa më shpejt të jetë e mundur”, tha ai.
