Pete Davidson është një nga emrat më të komentuar të momentit, që nga lidhja e tij me Kim Kardashian dhe konfliktet e vazhdueshme indirekte të tij dhe Kanye West. Teksa gjithmonë është shfaqur i pashqetësuar ndaj të gjitha kërcënimeve dhe akuzave të reperit, Pete tashmë do të provojë një eksperiencë të re.
Ylli i “Saturday Night Live” është afër nënshkrimit të një marrëveshjeje për t’u bashkuar me Jeff Bezos në një fluturim në Blue Origin, ka zbuluar “Page Six”.
Davidson, 28 vjeç, u pa në kompleksin e miliarderit në Los Angeles në janar, teksa ai dhe e dashura e tij Kim Kardashian mbërritën për darkë me Bezos dhe dashurinë e tij prej shumë kohësh Lauren Sanchez.
“Pete është shumë i emocionuar”, ka thënë një burim i Davidson për “Page Six”. “Ata nuk kanë nënshkruar ende kontratë, por duket se do të ndodhë së shpejti. Detajet janë duke u finalizuar dhe ai shkoi shumë mirë me Jeff-in kur u takuan.”
Nuk dihet ende se kur Davidson do të shkojë në hapësirë, por ka të ngjarë të jetë më vonë këtë vit, tha burimi.
Vetëm muajin e kaluar, personazhi i Davidson-it, Chad, u kthye në “Saturday Night Live” si një kolonist i Marsit në episodin e organizuar nga CEO i Space X, Elon Musk.
