Paris Jackson bëri një pushim prej dy vitesh nga rrjetet sociale, pas një tentative për vetëvrasje. Tani ajo shpjegon se veprimi ishte për shkak të “aq shumë urrejtje” të komentuesve online.
Por vajza e të ndjerit Michael Jackson e bëri profilin e saj në “Instagram” sërish publik, vetëm për t’u sulmuar edhe një herë nga armiqtë në internet.
“Kur isha 14 vjeç kisha kaq shumë njerëz që më urrenin, sa u përpoqa që të vrisja veten”, tha 18-vjeçarja në një video në “Instagram” të mërkurën, që është fshirë tashmë.
“Dhe më pas bëra një pushim 2-vjeçar nga mediat sociale dhe njerëzit më kërkonin që të kthehesha, që ta bëja “Instagram”-in sërish publik. Kështu që unë e bëra dhe asgjë nuk ka ndryshuar. Nuk e kuptoj se si mund të ketë kaq shumë njerëz që urrejnë në botë”, pyet ajo.
“Jam përpjekur që të mbledh veten, i kam provuar të gjitha, të bllokoj gjërat që përcjellin urrejtje, të mos lexoj komentet”, vazhdon mes lotësh Paris, “kam provuar shumë gjëra, t’i injoroj, por është e vështirë. Kur ka kaq shumë urrejtje”.
Adoleshentja vazhdon më tej: “Dhe nuk e kuptoj pse jam një shënjestër kaq e lehtë. Përpiqem të jem e sjellshme me të gjithë që takoj. I jap të gjithëve një shans. Jam përgjithësisht një person që besoj shumë”.
Ajo i foli drejtpërdrejtë fansave dhe ndjekësve të saj në mediat sociale.
“Përpiqem të jem e hapur me ju, lidhur me atë që bëj në përditshmëri, ndaj jetën me ju, nuk fsheh shumë gjëra, jam shumë publike. Kështu që më vjen keq nëse është diçka që po bëj që ju nuk e pëlqeni. Ndoshta jam shumë publike? Nuk e di. Thjesht jam lodhur prej kësaj, jam vërtetë e lodhur”, shprehet e mërzitur 18-vjeçarja Paris. Duket se këtë herë ajo nuk do të përsërisë më të njëjtin gabim!
Burimi: Daily Mail
