Spanja po planifikon t’u ofrojë të rinjve 250 euro në muaj për t’i stimuluar ata të largohen nga shtëpia e prindërve të tyre dhe të marrin ambient me qira për të jetuar.
Presidenti spanjoll, Pedro Sanchez njoftoi propozimin të martën, si pjesë e buxhetit të qeverisë për vitin 2022.
Personat e moshës 18 deri në 35 vjeç do të kenë të drejtë për bonusin e qirasë, nëse propozimi buxhetor miratohet nga parlamenti. Përveç kësaj, familjeve më të rrezikuara mund t’u ofrohen subvencione shtesë që mbulojnë deri në 40% të qirasë së tyre, sipas njoftimit të qeverisë.
“Ne po flasim për një rimëkëmbje të drejtë ekonomike dhe kjo do të thotë lehtësim i qasjes në strehim, veçanërisht për ata që janë më të prekshëm nga pasiguria, siç janë të rinjtë tanë,” tha Sanchez. Ai po fliste në një ngjarje të organizuar nga Programi i Kombeve të Bashkuara për Vendosjen Njerëzore, i njohur si UN-Habitat.
Të dhënat e Eurostat nga viti 2020 treguan se njerëzit në Spanjë u larguan nga shtëpia e prindërve të tyre mesatarisht rreth 30 vjeç, katër vjet më vonë se mosha tipike për të gjithë Bashkimin Evropian.
Një raport i bankës amerikane Brookings, i botuar në prill, deklaroi se një “paragjykim i fortë i politikave ndaj pronësisë së shtëpisë” në Spanjë nënkuptonte që më pak se një në katër nga familjet e vendit të merrnin me qira shtëpitë e tyre.
Sidoqoftë, raporti vuri në dukje se kishte pasur një rritje graduale të kërkesës për qira, pasi pasiguria në punë dhe pagat e ulëta i pengonin të rinjtë të blinin shtëpi, si dhe më shumë kujdes nga bankat për të ofruar hipoteka.
Sipas të dhënave të publikuara nga Eurostat, një apartament me një dhomë gjumi në kryeqytetin spanjoll të Madridit kushtonte rreth 1.000 euro në muaj për t’u marrë me qira në vitin 2020. Të dhëna të veçanta treguan se vitin e kaluar, një person i vetëm pa fëmijë në Spanjë fitoi rreth 21.241 euro, pak më poshtë mesatarja e BE -së prej 24,005 euro.
