Juventus po has vështirësi në tentativën për të afruar Bernardo Silva gjatë merkatos së verës, pasi në garë është futur edhe Atletico Madrid. Klubi spanjoll duket i vendosur për të siguruar shërbimet e mesfushorit portugez, i cili pritet të largohet nga Manchester City pas një aventure të suksesshme që zgjati nëntë vite.
Sipas raportimeve nga Spanja, trajneri Diego Simeone e konsideron Bernardo Silvën si një nga elementët kyç të projektit të ri të Atletico Madrid. Portugezi shihet si lojtari ideal për të marrë më shumë përgjegjësi në skuadër dhe për të udhëhequr repartin ofensiv në sezonin e ardhshëm.
Nga ana tjetër, Juventusi prej muajsh ka punuar për këtë transferim dhe ka mbajtur kontakte të vazhdueshme me agjentët e futbollistit. Megjithatë, situata është komplikuar për shkak të konkurrencës së fortë dhe pasigurisë së bardhezinjve për një vend në Champions League.
Bernardo Silva konsiderohet një nga lojtarët më të kompletuar në Europë, falë aftësisë për të luajtur në disa role në sulm dhe mesfushë. Gjatë periudhës te Manchester City, ai ka qenë vendimtar në shumë ndeshje, duke kontribuar me gola dhe asistime të rëndësishme.
Nëse operacioni për portugezin nuk realizohet, Juventusi pritet të shqyrtojë alternativa të tjera në merkato për të përforcuar repartin ofensiv.
