Këngëtarja e njohur e muzikës pop, Gloria Estefan ka tronditur me deklaratën e dhënë së fundmi se është abuzuar seksualisht nga një anëtar i familjes, kur ishte vetëm nëntë vjeçe.
Në rrëfimin e saj, 64-vjeçarja ka treguar se ajo ishte ngacmuar teksa ndiqte mësimin në shkollën e muzikës, nga një person, të cilit e ëma i besonte.
“93% e fëmijëve të abuzuar i njohin dhe u besojnë abuzuesve. Edhe unë e di këtë sepse unë jam një prej tyre”, ka deklaruar ajo.
Po ashtu, Gloria ka treguar se i afërmi kishte shfrytëzuar besimin e nënës së saj, për ta ngacmuar atë.
“Ai ishte anëtar i familjes, por jo i familjes së ngushtë. Ai ishte në pozitën e fuqisë, sepse nëna ime më ka dërguar në shkollën e tij të muzikës dhe ai menjëherë filloi të më thoshte se sa e talentuar isha, dhe se si unë kisha nevojë për vëmendje të posaçme”, ka rrëfyer ajo.
Ndër të tjera, këngëtarja ka treguar se madje ai e ka kërcënuar duke i thënë se nëse do ta marrë vesh e ëma, do ta vriste nënën e saj.
“I thashë, nuk mund të ndodhë kjo, nuk mund ta bësh këtë, por ai më tha se babai im ishte në Vitenam ndërkaq nëna ishte e vetme dhe se nëse i tregoja nënës, ai do ta vriste atë”, ka përfunduar ajo.
