Treni është një mjet transporti shumë i rëndësishëm në botë. Shumica e shteteve i japin këtij mjeti rëndësinë e duhur duke plotësuar dëshirat e çdo klientele. Pavarësisht se nuk mund të thuhet se kush është saktësisht treni më luksoz në botë, ka disa të tillë, ku udhëtimi me ta është një përjetim që do ta mbani në mendje gjatë, qoftë për luksin që ofrojnë, qoftë dhe për vendet përrallore që ata përshkojnë gjatë rrugës së tyre.
“Maharaja Express”
Treni i njohur si “The Maharaja Express”, në vitin 2012 u shpall si treni më luksoz në botë, në ceremoninë “World Travel Awards”. Ky tren ofron mundësinë të përjetoni magjinë e peizazheve të Indisë dhe kulturën e saj. “The Maharaja Express” mban vetëm 88 pasagjerë njëkohësisht, ndërsa kalon nëpërmjet pjesëve veriore të Indisë, si Jaipur, Jodhpur, Agra, Varanasi dhe Bikaner, që janë destinacionet më të popullarizuara turistike në këtë vend.
“Palace on Wheels” (Pallati mbi rrota)
Ky treni është i parë që ofroi të gjitha shërbimet hoteliere për pasagjerët, ndërsa sot ka dhe dy restorante të njohura që ofrojnë specialitete të kulinarisë. Ai operon që nga viti 1982 dhe është shumë i njohur për eksplorimin e Indisë. Udhëtimi njëjavor me këtë tren përshkon vendet e njohura si Jaipur, Jodhpur, Udaipur, Chittaurgarh, Jaisalmer dhe përfundon në Agra, pasi të keni vizituar Taj Mahal-in, një prej shtatë mrekullive të botës të shpallur nga UNESCO.
“Venice Simplon Orient Express”
Ky është treni më autentik që posedon vagonët e vitit 1920. Ai udhëton ndërmjet Parisit dhe Stambollit, ndërsa udhëtimi me të zgjatë gjashtë ditë, me ndalje në Budapest dhe Bukuresht. Treni njihet edhe për kuzhinën e njohur franceze, ushqimi i së cilës iu serviret udhëtarëve. Një tjetër detaj tjetër është që pasagjerët mund të blejnë suvenire në “shëtitoren” që ekziston brenda trenit.
“Indian Pacific” (Indian-Paqësor)
Emri i tij vjen nga dy oqeanet, atij Indian dhe Paqësor, ndërsa mbulon një distancë prej 4,352 km, mes Sidnejt dhe Perthit, në Australi. Udhëtimi me këtë tren luksoz zgjatë katër ditë e tri net, ndërsa kalon përmes viseve më të bukura të Australisë. Treni “Indian Pacific” ndalon në disa vende gjatë rrugëtimit të tij, në mënyrë që pasagjerët të mund të eksplorojnë vendet e bukura të Australisë, si Adelaide, Cook, Broken Hill dhe Kalgoorlie.
“Pride of Africa” (Krenaria e Afrikës)
Treni “Pride of Africa” ofron një udhëtim mbresëlënës nëntë ditor. Udhëtimi me këtë tren ofron atraksione të veçanta për artistët dhe fotografët, të cilët kanë mundësi të realizojnë fotografi dhe pamje unike gjatë udhëtimit. Treni kalon në Parkun Kombëtar me kafshët e egra, përmes minierave të diamanteve, apo dhe përmes shkretëtirës Kalahari.
