Mad Clip, reperi i njohur me origjinë greke, ndërroi jetë pak ditë më parë pas një aksidenti automobilistik në Vouliagmeni, Athinë. Makina “Porsche” që po ngiste, devijoi nga rruga dhe u përplas në një shtyllë.
Përplasja ishte shumë e fortë pasi mjeti u shkatërrua plotësisht dhe madje grupit hetimor iu desh kohë të zbulonte që viktima ishte reperi, emri i vërtetë i të cilit është Peter Anastasopoulos. Mediat fqinje raportojnë se shërbimet zjarrfikëse u përpoqën me orë të tëra për të nxjerrë trupin nga automjeti.
Ndërkohë qindra njerëz u mblodhën për t’i dhënë lamtumirën e fundit reperit në ceremoninë mortore në Paleo Faliro, ku ishte e pranishme dhe këngëtarja shqiptare, Eleni Foureira.
Ajo i dha lamtumirën mikut dhe bashkëpunëtorit të ngushtë me të cilin performoi në dasmën e mikut të përbashkët, përpara se të ndodhte aksidenti tragjik.
Para tre muajsh reperi grek bashkoi forcat me këngëtaren shqiptare dhe publikuan këngën me titullin “Mundet”.
Pas këtij lajmi të trishtë, Foureira ka postuar në Instagramin e saj një foto totalisht të zezë, në feed, dhe në Instastory, duke treguar dhimbjen e madhe që ndjen pa mundur të thotë dot asnjë fjalë.
Po ashtu edhe Morena Taraku, ka reaguar e tronditur për ndarjen nga jeta të reperit të njohur grek.
Ajo ka publikuar në rrjetet sociale foto të reperit krahas së cilës ka treguar se kanë pasur plane të përbashkëta muzikore për një projekt që fatkeqësisht është lënë përgjysmë.
“Nuk mund ta besoj vëlla. U prehsh në paqe. Kënga jonë mbeti…”, ka shkruar këngëtarja.
Në lidhje me këtë lajm ka reaguar edhe reperi Stresi, që duket se ka pasur njohje me Mad Clip. Ai ka postuar në Instagram një foto të reperit të ndjerë dhe është shprehur shumë i trishtuar për ndarjen e tij nga jeta.
“U prehsh në paqe Mad Clip. Më vjen shumë keq për ty”, shkruan Stresi në një postim, teksa ai ka shprehur ngushëllimet dhe një personi të afërt të reperit grek.
