Ndryshimet në të folur dhe problemet me shikimin mund të jenë ndër shenjat e para, por shpesh të neglizhuara, të demencës me fillim të hershëm, paralajmërojnë ekspertët.
Demenca është një sëmundje që dëmton kujtesën dhe aftësitë njohëse, dhe zakonisht lidhet me moshën e tretë, pasi pjesa më e madhe e rasteve diagnostikohen tek të moshuarit. Megjithatë, mjekët po vërejnë një rritje të rasteve të demencës me fillim të hershëm, ku diagnoza vendoset para moshës 65 vjeç, veçanërisht në Mbretërinë e Bashkuar.
Sipas ekspertëve, të rinjtë shpesh nuk janë të vetëdijshëm për simptomat e hershme, të cilat mund të ndryshojnë nga humbja tipike e kujtesës. Në një analizë për The Conversation, Molly Murray, eksperte në demencën me fillim të hershëm nga Universiteti i Perëndimit të Skocisë, thekson se për shumë pacientë, shenja e parë mund të lidhet me shikimin.
Sipas saj, rreth një e treta e personave me Alzheimer me fillim të hershëm përjetojnë probleme me koordinimin dhe ndryshime në perceptimin vizual. Këto mund të shfaqen si vështirësi në lexim, orientim në hapësirë apo në kryerjen e veprimeve të përditshme si veshja.
Ekspertët theksojnë se këto probleme nuk lidhen me dobësim të syrit, por me mënyrën se si truri përpunon informacionin vizual, duke i bërë ato simptoma neurologjike dhe jo okulistike.
