Ministria e Shëndetësisë në Kosovë ka njoftuar se ka aprovuar rekomandimin nga Komiteti për Imunizim kundër COVID-19 për vaksinimin e fëmijëve mbi moshën 12-vjeçare.
Një gjë e tillë është bërë e ditur nga vetë institucioni nëpërmjet një komunikate për mediat, ku theksohet se do jetë i mundur vaksinimi i personave mbi 16 vjeç me vaksinën Pfizer dhe vaksinimi i grupmoshës 12-15 vjeç me prioritet dhe sipas problemeve shëndetësore.
“Duke marrë parasysh që vaksina Pfizer BioN/Tech është aprovuar nga FDA dhe EMA për vaksinimin e moshave mbi 12 vjeç, plotësimi i planit përfshin: Vaksinimin e personave mbi 16 vjeç me vaksinën Pfizer dhe vaksinimin e grup moshës 12-15 vjeç me prioritet dhe sipas indikacioneve shëndetësore”, thuhet në njoftim.
Kujtojmë se ditët e fundit, numri i fëmijëve të infektuar me COVID-19 në Kosovë është rritur ndjeshëm. Vetëm në raportin e 24 orëve të fundit nga Ministria e Shëndetësisë është bërë e ditur se 14 fëmijë, nga mosha 9-vjeç janë konfirmuar me COVID-19. Po ashtu, sipas raportimeve një numër të lartë infektimesh kanë edhe nga mosha 10 deri në 19 vjeç.
Sjellim në vëmendje se shifrat që u publikuan ditën e djeshme nga Kosova ishin shqetësuese, ndërsa në mesin e të infektuarve ishin edhe 21 fëmijë të moshës 0-9 vjeç. Po ashtu sipas të dhënave të bëra publike ditën e sotme nga Ministria e Shëndetësisë, nga 5.646 testime, 740 qytetarë kanë rezultuar pozitiv me virusin COVID-19. MSH njofton se gjatë 24 orëve të fundit, janë shënuar 2 raste të vdekjes.
