“Tirana mes kryeqyteteve” është projekti i fundit artistik i çiftit të njohur të balerinëve Enada dhe Gerd Vaso. Duke qenë të distancuar prej muajsh nga çdo vend tjetër i botës, balerinët kanë vendosur që të na bashkojnë me kryeqytetet e tjera evropiane përmes këtij projekti. Ata kanë ndërthurur performancat e tyre me këngë të ndryshme, ndërsa çdo lëvizje shoqërohet me pamje nga disa nga zonat më të bukura të kryqyetit shqiptar.
Enada dhe Gerd Vaso kanë zgjedhur të promovojnë pjesën e gjelbër dhe historike të Tiranës, duke i dhënë kështu mundësinë qytetit që të njihet akoma më shumë brenda dhe jashtë vendit. Me këtë rast çifti i balerinëve kanë vendosur të mbështesin edhe artistët e rinj, 5 instrumentistë që i kanë shoqëruar në këto performanca me muzikë.
Për këtë projekt të veçantë janë zgjedhur zonat më të bukura të Tiranës si qendra dhe sheshi Nënë Tereza, Shëngjergji, Mali me Gropa dhe Liqeni Artificial. Ata kanë premtuar se së shpejti do të vijnë me projekte të tjera online, duke qenë se pandemia nuk i lejon që të ngjiten në skenë dhe të dhurojnë diçka nga arti i tyre.
