Pandemia e koronavirusit është në kulmin e saj në vendin tonë, si për të infektuar, ashtu dhe për viktima, por po ashtu në kulmin e tyre të fitimeve duket se janë edhe spekulantët.
Këta të fundit ashtu si në muajt mars-prill kur çmimet e maskave dhe dorezave shkuan në stratosferë, përsëri kanë nisur spekulimet por këtë herë me produkte edhe më jetike.
Pas medikamenteve të caktuara, bombolave të oksigjenit, aparateve të frymëmarrjes, tani radhën për t’u bërë produkt fitimprurës nga spekulantët e kanë pasur termometrat e thjeshtë që matin temperaturën e njeriut.
Në farmacitë e Tiranës aktualisht ka mungesë termometrash, nga ata më të thjeshtët me çmim 100-150 lekë, e deri tek termometrat elektronikë, raporton sot në një vëzhgim të tijin “Monitor.al”.
Teksa gjenden më vështirësi termometra të thjeshtë, disa të tjerë “luksozë” me zhivë ekologjike kushtojnë mbi 900-1100 lekë nëpër farmacitë e kryeqytetit, në një kohë që ata elektronikë kushtojnë minimalisht 1500 lekë.
Sipas vëzhgimit të bërë nga “Monitor”, në shumë farmaci në kryeqytet nuk mund të siguroje dot një termometër i zakonshëm, nga ata me zhivë, që përpara pandemisë kushtonin në farmaci vetëm 100 lekë (të reja).
Spekulimi me termometrat
Mungesa e termometrave dhe rritja e çmimit vjen si vështirësi shtesë në kulmin e pandemisë, kur trajtimi dhe parapërgatitja nis pikërisht me to. Farmacistët në Tiranë në shumicën e pikave të shitjes pohuan se, stoku i furnizimeve ka disa ditë që ka përfunduar, për shkak të kërkesës së lartë nga pandemia, ndërkohë që nuk ka sinjale për furnizime të reja.
Në ndonjë farmaci janë vetëm disa lloje të shtrenjtë termometrash, me kosto gati 10 herë më të lartë se i zakonshmi, që përdorej masivisht deri tani.
Farmacistët e lidhin mungesën e termometrave me dy arsye. E para për shkak të kërkesës së lartë që ka krijuar pandemia Covid-19, për produkte farmaceutike që bëri të mbaronin rezervat. Së dyti për disa standarde të reja që aplikohen nga BE për importin e termometrave nga Kina.
BE ka ndaluar importin e termometrit të zakonshëm me zhivë, për shkak të rrezikshmërisë për shëndetin. Shqipëria po aplikon këtë standard dhe kjo ka bërë që importet e termometrit nga Kina të mos lejohen më.
Kjo masë ka sjellë hendek në treg, pasi grosistet janë gjendur të parapërgatitur për të plotësuar kërkesën e lartë, që erdhi nga pandemia. Në këtë situatë kanë nisur edhe abuzimit me çmimet. Një termometër me zhivë ekologjike që plotëson standardin kushton duke filluar nga 900 lekë në shitjet me pakicë në farmaci, ndërsa burime nga depot farmaceutike thanë se, çmimi me shumicë i tyre është rreth 300 lekë.
Farmacitë pjesë e spekulimit
Askush nuk i kontrollon ato rregullisht, ndaj për disa farmacitë janë kthyer në “miniera ari” në këtë kohë. Aktualisht, jo të gjitha farmacitë ofrojnë termometra me zhive ekologjike në kryeqytet.
Në të shumtën e rasteve, nuk kanë asnjë lloj termometri, për shkak se termometrat e rinj ekologjikë nuk preferohen nga qytetarët për shkak të çmimit të lartë, ndërsa ata ishin mësuar që kosto e tij nuk i kalonte 150 lekët.
Në këto ditë të vështirë ku shumë të sëmurë e kanë të pamundur të bëjnë lëvizje të gjata, gjetja e një termometri është sfidë përveç kostove të larta.
Intensifikimi i pandemisë me shtimin e numrit të të infektuarve, ka rritur kërkesën për produkte farmaceutike. Në muajin tetor importet e produkteve farmaceutike u rriten me 40%, në raport me muajin tetor të një viti më parë raportonte INSTAT.
Konsumi i medikamenteve dhe pajisjeve të tjera që lidhen me pandeminë, ka pësuar rritje jo të zakontë, të tilla si vitaminat, suplementet, antibiotikët dhe pajisje të tjera mjekësore për laboratorët dhe radiologji për ekzaminime.
/Burimi: INSTAT; Monitor.al/Përshtati: Iconstyle.al/
