Pandemia e koronavirusit ka edhe një pacient të cilin e ka bërë për “vdekje” në radhët e bizneseve. Ai është sektori i turizmit i cili duket se nuk po arrin që të marrë frymë më nga kjo situatë me bllokime dhe masa shtrënguese.
Pikërisht atëherë kur dukej se sezoni dimëror do të ishte pak më i mirë për operatorët turistikë, sidomos ata të hotelerisë dhe turizmit dimëror, vala e dytë e pandemisë ka bërë që për këtë vit të shuhet çdo shpresë.
Kreu i Shoqatës shqiptare të Hotelerisë, Zak Topuzi, është shprehur se në sektorin e turizmit situata është përkeqësuar dhe po aq është zbehur shpresa për përmirësim, kur shtetet kryesore të BE-së nisën kufizimet.
Ai tha për “Monitor” se, kufizimet apo “lock-doën” pjesor në këto vende kanë sjellë mbyllje të aktiviteteve në hotele, bare dhe restorante, duke rritur rrezikun për një tjetër rënie të ekonomisë globale, që pritet të ketë ndikimin edhe në Shqipëri.
Qeveria vendosi masa të reja kufizuese dhe po përgatitet për të tjera. Serioze paraqitet gjendja me punonjësit e industrisë. Më shumë se gjysma e tyre, aktualisht janë pa punë.
Topuzi shprehet se, referuar shifrave të INSTAT, numri i turistëve të huaj që kanë hyrë në Shqipëri gjatë 9-mujorit është rreth 39% më pak, krahasuar me vitin 2019 (rreth 3% janë udhëtare tranzit).
Agjencitë turistike drejt falimentit
Akomodimi në hotele ka qenë vetëm 10%, për shkak të mungesës së lëvizjeve të linjave ajrore, bllokimit të kufijve të BE-së dhe turizmit të biznesit dhe konferencave. Situata paraqitet më keq për bizneset e agjencive, guidave, transportit turistik etj, 95% e të cilëve kanë ndërprerë aktivitetin në pamundësi për të paguar qiratë dhe taksat.
Situata është e njëjtë në mjaft vende të BE-së, por për turizmin këto shtete kanë dhënë mbështetjen dhe stimulim maksimal, thotë Zak Topuzi.
Sipas “Ceoworld.biz”, botimi i 5 tetorit 2020, në 10 vendet europiane të varura nga turizmi, Shqipëria vjen e dyta pas Malit të Zi. E përkthyer në shifra ekonomike COVID-19 do të lërë pasoja shkatërruese në rast se, qeveritë nuk marrin masa emergjente.
Po të analizojmë paketat rajonale, vëmë re se Mali i Zi, miratoi Paketën 3, me vlerë 1,2 mld euro, me 90 mln euro dedikuar vetëm sektorit të turizmit. Maqedonia e Veriut, këto ditë miratoi Paketën 4 të “rimëkëmbjes ekonomike” ku turizmi merr vëmendje maksimale.
Qeveria e Malit të Zi mbulon 70% të pagës minimale dhe 100% taksat dhe sigurimet shoqërore të pagës. Pjesë e rëndësishme te paketat e vendeve të rajonit është kreditimi dhe subvencioni i Ndërmarrjeve të Vogla e të Mesme, deri tek pensionistët e të papunët të paregjistruar. Po ashtu është dhënë kredi shtesë pa kamatë për ndërmarrjet me qarkullim deri në 90 mijë euro, me një periudhë shlyerjeje deri në 3 vjet, për një periudhë gracy (pa pagesë) për 12 muaj, të destinuara për kapital qarkullues.
Për industrinë turistike janë dhënë grante me vlerë 3 mijë deri në 10 mijë euro për të punësuarit, si: agjenci, transportues turistikë, guida, udhërrëfyes turistikë, këngëtarë, bare, restorante, salla dasmash dhe eventesh etj., që për shkak të pandemisë kufizuan punën.
Qeveria dhe ministria e Klosit, asnjë ndihmë turizmit
Krahasuar me rajonin, industria e turizmit në Shqipëri, pavarësisht kontributit të madh në ekonomi, ka marrë vëmendje periferike nga qeveria, sipas përfaqësuesit të Shoqatës të Hotelerisë, Topuzi.
“Garancia Sovrane 1 për pagat dhe Garancia Sovrane 2 nuke ndihmuan këtë industri për kushtet specifike që ka sektori. Garancia Sovrane 1 nuk mundi të zbatohet, pasi për muajt prill, maj, pjesa më e madhe e punonjësve të turizmit ishin larguar nga puna, ose nuk ishin marrë ende, për shkak të nisjes me vonesë të sezonit.
Strukturat e bregdetit zhvilluan turizmin në një sezon rreth 60 ditë, vetëm në periudhën korrik-gusht. Shoqatat Botërore të Turizmit dhe Udhëtimit (WTTC) dhe Bashkimi Europian, që në ditët e para të muajit mars, u kërkuan qeverive të reagojnë në ndihmë të Industrisë Turistike dhe Udhëtimit.
Kërkesa kryesore e tyre ishte: të gjitha taksat, detyrimet dhe kërkesat financiare të sektorit të turizmit dhe udhëtimit, duhet të hiqen me efekt të menjëhershëm të paktën për 12 muajt e ardhshëm”.
Me Paketën 2 të dhënies së ndihmës financiare, qeveria parashikonte që për të punësuarit në sektorin e turizmit të përfitohej bonusi 40 mijë lekë për 10 mijë të punësuar.
Sipas të dhënave të përditësuara të Ministrisë së Financave, deri më 3 nëntor, Masa 4 e Paketës 2 është shpërndarë për 50% të numrit të përfituesve të pritshëm për 1 mijë biznese. Fondi i shpërndarë është 197 mln lekë.
Goditja e shërbimeve, më të prekurat agjencitë e udhëtimit
Situata paraqitet e përkeqësuar edhe për agjencitë e udhëtimit, të cilat po vuajnë mungesën e rezervimeve, pas “rigjallërimit” që patën në muajt korrik-gusht.
Arsye e tkurrjes së kërkesës është frika nga infektimi, qytetarët stepen të bëjnë rezervime, veçanërisht në destinacionet e lejuara për të udhëtuar për turizëm, si Turqia (udhëtimet me charter u lejuan nga 15 korriku), Mali i Zi apo Maqedonia e Veriut.
Aktiviteti ekonomik në agjencitë e udhëtimeve pothuajse është i paralizuar, dhe me shtimin e rasteve me koronavirus në vend, prerja e biletave për qëllime pune ka arritur në minimum.
Edhe përfaqësuesit e kësaj industrie thonë se nëse ndodh mbyllja e dytë e ekonomisë, do të krijonte vështirësi të mëdha financiare për agjencitë e udhëtimit. Në total, në vend operojnë 950 agjenci udhëtimi, ku 350 prej tyre janë në Tiranë.
Agjencitë e udhëtimit qarkullojnë rreth 21 milionë euro në muaj, sipas INSTAT, por xhiro e tyre është e fryrë, pasi prej më se tre vitesh pas kërkesave të reja të standardeve të kontabilitetit, ato raportojnë edhe vlerën e biletës, ndërsa më parë deklaronin vetëm marzhin që ato arkëtonin.
/Burimi: Monitor.al/ Përshtati: Iconstyle.al/
