Ka përfunduar protesta e studentëve shqiptarë, e cila zgjati rreth dy orë dhe u zhvillua në formë tubimi paqësor.
Protesta u shoqërua me këngë patriotike dhe thirrje për të drejtat e studentëve, ndërsa në të morën pjesë edhe studentë nga Shqipëria dhe Kosova.
Gjatë protestës, të pranishmit kanë kënduar himnin e flamurit dhe kanë shprehur mesazhe mobilizuese. Në disa momente janë dëgjuar edhe thirrje në kor, përfshirë “UÇK, UÇK”.
Në fjalën e mbajtur, organizatori i protestës Mevlan Ademi theksoi se “jemi për barazi dhe respekt”, dhe të gjithë bashkë do të kërkojmë të drejtat tona.
“Ky zë nuk ndalet, kalon brez pas brezi. Çohu shqiptar për gjuhën tonë”, tha ai.
Një tjetër student i bëri thirrje ministrit të Drejtësisë të japë dorëheqjen, duke theksuar se “shqiptarët nuk do të lodhen së kërkuari të drejtat e tyre”.
Po ashtu një apel ata ia drejtuan edhe kryeministrit Mickovski, që të tregojë se zgjidhja vjen me dialog, dhe kjo çështje duhet të bashkojë gjithë partitë. “Sa më shumë të injorohet zëri i studentëve, do të rritet revolta. Ne rebelohemi kur na mohohet e drejta”, shprehen studentët.
Gjatë tubimit, tre studentë janë shoqëruar nga autoritetet, për arsye që nuk janë bërë ende publike.
Organizatori i protestës, Mevlan Ademi, u shpreh se kërkesa kryesore e protestuesve mbetet njohja e gjuhës shqipe në provimin e Jurisprudencës.
Ai theksoi se studentët do të vijojnë të kërkojnë zgjidhje institucionale përmes dialogut, duke e cilësuar këtë çështje si të drejtë themelore për barazi gjuhësore dhe akademike.
