Tre mjekë rusë të cilët u vaksinuan me vaksinën sipas Moskës zyrtare më të sigurtën deri më tani, pra me vaksinën Sputnik V, kanë rezultuar pas vaksinimit sërish pozitiv me Covid-19.
Vetëm një ditë më parë Kremlini shpalli vaksinën e prodhuar ruse “Sputnik V” si më të mirën në botë” me 92% efektivitet.
Ndërkohë mediat ruse kanë bërë me dije se mjekët e vaksinuar, kishin marrë vetëm të parën nga dy doza të nevojshme për imunizim.
Vetë presidenti Vladimir Putin, e shpalli në gusht këtë vaksinë si kurën e parë kundër koronavirusit, por u përball pas kësaj deklarate me shumë kritika nga perëndimi, të cilët pretendonin se nuk mund të dilte një kurë e plotë, përpara kompletimit të fazës së plotë të testimeve.
Sakaq, prodhuesit e vaksinës, kanë deklaruar tashmë se mbrojtja nga virusi vjen vetëm gjashtë javë pas dy injeksioneve të para të vaksinës, të cilat bëhen 21 ditë larg njëra-tjetrës.
Deklarimi erdhi vetëm pasi 3 nga 42 mjekët e rajonit të Altai në Siberi u infektuan me Covid pas marrjes së dozave të vaksinës.
Prodhuesit e vaksinës kanë theksuar se imuniteti merret vetëm pas fazës së dytë të vaksinimit, ndërkohë që mjekët janë infektuar 24 orë pas bërjes së dozës së parë të vaksinës ruse anti-covid.
Doktorët duhet të merrnin dozën e dytë të vaksinës më 14 tetor, por nuk është e qartë se kur saktësisht tre mjekët u identifikuan me Covid-19, edhe pse tashmë ata janë shëruar nga sëmundja.
Kujtojmë se Rusia është duke vaksinuar gradualisht të gjithë punonjësit e saj të shëndetësisë dhe profesionistë të tjerë të fushave të cilët janë në kontakt të përhershëm me njerëzit e tjerë, siç janë mësuesit dhe policët./Iconstyle.al/
