Ministrja e Shëndetësisë, Ogerta Manastirliu, firmosi sot një marrëveshje me Organizatën Botërore të Shëndetësisë, përkatësisht me Drejtorin e OBSH për Europën Dr. Hans Kluge. Kjo marrëveshje do të përmirësojë aksesin në shërbimet thelbësore, do të forcojë kapacitetet për të parandaluar dhe kontrolluar epidemitë, si dhe do të forcojë akoma më shumë kapacitete në lidhje me inovacionin dhe digjitalizimin si dhe për adresimin e faktorëve përcaktues të shëndetit me qëllimin për popullatë më të shëndetshme.
Hans Kluge veçoi gjatë fjalës së tij disa nga pikat e marrëveshjes që nënshkruhen sot mes OBSH-së dhe Shqipërisë. Gjithashtu ai tha se sapo vaksina anti-Covid të hidhet në treg, të parët që do e marrin do të jenë të moshuarit dhe mjekët.
Kluge theksoi se nëse maskat do të ishin mbajtur që në fillim të pandemisë dhe do të ihste respektuar distanca fizike, do të ishin shpëtuar 260 mijë jetë njerëzish në Evropë.
“Duhet të përballemi me virusin që në kujdesin parësor. Populli italian e ka vlerësuar solidaritetin në fazën e hershme të pandemisë. Ne duhet të theksojmë edhe më tepër solidaritetin nëpërmjet mekanizmit COVAX. Ne duhet të kishim nxjerrë mësime tani. Ne e dimë se sasia e vaksinës do të jetë më e vogël se nevoja. Të parët do përfitojnë të moshuarit dhe sistemi shëndetësor. Njerëzit po lodhen nga masat kufizuese. Kjo është një krizë që po zgjat. Po na lodhen energjitë. Ne duhet të përpiqemi të kuptojmë se pse disa nuk i respektojnë masat. Nëse do rritej mbajtja e maskave dhe do kishte kontroll të distancës do kishim 260 mijë jetë të shpëtuara prej fillimit të shkurtit. Duhet të shtojmë përfshirjen dhe angazhimin”, u shpreh Hans Kluge.
Gjithashtu Kluge bëri me dije se testet e shpejta për COVID që nxjerrin përgjigjen për 40 minuta, pritet të vijnë në Shqipëri për 8-10 javë.
“Jemi marrë me kohën e dorëzimit të testeve të shpejta pas 8 apo 10 javësh. Ne po përpiqemi ta përshpejtojmë. Shkenca ka lëvizur shpejt. Të gjithë po koordinohemi për të përshpejtuar këtë punë”, tha ai.
