Ashtu sikundër pritej vjeshta ka ardhur së bashku me valën e dytë të pandemisë dhe shifrat e larta të viktimave dhe të të infektuarve janë rikthyer.
Shumë shtete europiane kanë nisur rimbylljen, teksa kontineti i vjetër është rikthyer sërish në epiqendrën e virusit pas disa muajsh me shifra të ulta.
Ditën e djeshme në vendin tonë u raportua një rekord i ri infektimesh 421 raste të reja dhe 7 viktima.
Spitali Infektiv po përballet me urgjenca në rritje, të cilat i kalojnë në disa raste Sanatoriumit. Sipas News24, prej 10 ditësh COVID 1 thuajse i ka ezauruar kapacitetet e tij. Ndërkohë që shtrimet e reja bëhen në varësi të personave që lënë spitalin.
Ndonëse radhën për të pritur urgjencat në Tiranë i ka Infektivi, në disa raste ato i referohen “Shefqet Ndroqit”, për të mos mbingarkuar më shumë punën.
Po e njëjta media raporton se pas datës 15 nëntor, radhën për të pritur urgjencat e kryeqytetit i kalon Sanatoriumit. Tashmë në lojë ka hyrë dhe COVID3, në të cilën po trajtohen edhe raste me komplikacione, ndonëse u tha se aty do të kuroheshin personat që ishin më lehtë.
