Një tjetër person i infektuar nga Covid-19 ka vrarë veten. Mësohet se viktima e radhës është një 77-vjeçar, me emrin Hekuran Korça, i cili vendosi që t’i jepte fund jetës ditës së djeshme, duke u hedhur nga ballkoni i banesës në zonën e Shkozës.
Policia e Shtetit njoftoi ditën e djeshme në një deklaratë për mediat se i moshuari kishte tentuar që të vriste veten, por kishte shkuar i gjallë në spital, edhe pse në gjendje të rëndë. Mesa duket Korça nuk u kishte shpëtuar plagëve të marra, dhe ka ndërruar jetë gjatë natës.
Sipas “AbcNews” 77-vjeçari ishte infektuar para një javë dhe ishte shtruar në spitalin Infektiv për të marrë trajtimin e nevojshëm. Ditën e dielë 77-vjeçari i është nënshtruar sërish tamponit, i cili kësaj herë rezultoi negativ. Ai doli nga spitali, ashtu siç e përshkruajnë fqinjët me bombulë oksigjeni me vete, por vetëm për të kryerë aktin e vetëvrasjes.
Babai i 5 fëmijëve jetonte vetëm në banesën e tij në Shkozë, jo më larg se një muaj më parë kishte humbur vajzën e tij. E reja, e cila prej kohësh jetonte në Greqi kishte ndërruar jetë si pasojë e një sëmundjeje të rëndë.
Kështu, shkon në katër numri i personave që kanë shkuar drejt këtij akti tragjik pas infektimit nga koronavirusi. 3 persona kanë vrarë veten në spitalin e Sanatoriumit, pasi vendosën që të hidheshin nga dritaret e dhomave të tyre.
