Katër fëmijët e riatdhesuar dje nga kampi Al-Hol bashkë me Floresha Rashën kanë nisur sot procesin e rehabilitimit dhe integrimit në shoqëri. Sipas abcnews.al është ngritur një grup pune i përbërë nga disa institucione, si Ministria e Shëndetësisë, Ministria e Arsimit, Ministria e Brendshme dhe Agjencia Kundër Ekstremizmit të Dhunshëm, të cilët kanë hartuar planin e punës për mënyrën se si do të vijojë trajtimi i 5 shqiptarëve të riatdhesuar.
Mësohet se plani i punës do të jetë afatgjatë. Aktualisht secilit prej tyre i është vendosur në dispozicion nga një mjek, infermier, psikolog, si dhe një ekspert arsimi. Gjendja e tyre shëndetësore paraqitet e mirë, por më problematike kanë anën psikologjike. Kjo pasi të riatdhesuarit kanë shfaqur shenja frike.
Nga grupi i punës mësohet se fillimisht me ta po punohet për ambientimin e tyre në territorin shqiptar. Nuk ka një afat të caktuar se sa 5 shqiptarët do të qëndrojnë në Kavalishencë në Durrës, ndërsa takimet me familjarët nuk do u ndalohen.
Po ashtu, pjesë e grupit të punës do të jetë edhe njësia e Anti-terrorit. Edhe pse nuk do të kenë agjentë pranë godinës ku janë strehuar katër fëmijët dhe Floresha Rasha, sërish ata do të vëzhgohen në distancë. Kjo për shkak të dyshimeve se mund të kenë lidhje me persona që mund t’i nxisin për qëllime terroriste.
Të gjitha mediat në vendin tonë ditën e sotme u pushtuan nga lajmet për rikthimin në atdhe të katër fëmijëve dhe gruas së parë nga kampi i Al-Holit në Siri. Gjysmëhëna e Kuqe siriane në bashkëpunim me autoritetet vendase kanë mundur që të kthejnë në vendlindje Floresha Rashën dhe tre fëmijët e saj, Amar, Emel dhe Hatixhe.
Bashkë me ta u rikthye edhe Endri Dumani, i cili tanimë i ka mbushur 12 vjeç. Sakaq, mbetet ende mister fati i motrës së tij, Evës, e cila nuk pranoi që të kthehej në Shqipëri nga frika se nëse do të kthehet në atdhe do e çojnë në jetimore!
