Franca po përballet me një valë të pazakontë të nxehti për muajin maj, ndërsa temperaturat ekstreme kanë shkaktuar edhe viktimën e parë. Një person humbi jetën gjatë një gare vrapimi në Paris, ndërsa të paktën 10 garues të tjerë përfunduan në spital për shkak të temperaturave të larta dhe problemeve shëndetësore të lidhura me vapën.
Sipas autoriteteve franceze, incidenti ndodhi gjatë një aktiviteti sportiv në kryeqytet, ndërsa shërbimet e emergjencës ndërhynë menjëherë për të ndihmuar pjesëmarrësit që shfaqën shenja lodhjeje dhe dehidratimi.
Shërbimi meteorologjik francez, Météo-France, bëri të ditur se temperaturat në Paris kanë kaluar 30 gradë Celsius për herë të parë këtë vit, duke arritur deri në 31.9°C. Ndërkohë, në disa zona të tjera të vendit janë thyer rekordet historike të muajit maj.
Meteorologët e lidhin këtë situatë me një fenomen të quajtur “kupolë termike”, që po sjell masa të nxehta ajri nga Afrika e Veriut dhe po mban temperaturat në nivele shumë të larta.
Autoritetet kanë vendosur në alarm disa rajone të Francës perëndimore, ndërsa parashikimet tregojnë se temperaturat mund të arrijnë deri në 35 gradë Celsius gjatë ditëve në vijim.
Ekspertët paralajmërojnë se valët e shpeshta të të nxehtit janë pasojë e ndryshimeve klimatike dhe pritet të bëhen gjithnjë e më intensive në vitet e ardhshme.
