Gjatë kësaj jave u hap zyrtarisht “Fshati i festave” nw Sheshin Skënderbej për të vazhduar traditën e këtyre viteve të fundit. Në shesh janë vendosur sërish shtëpizat e vogla prej druri, në të cilat biznese të ndryshme reklamojnë dhe shesin shërbime për qytetarët. “Fshati i festave” do të qëndrojë hapur deri në momentin e ndërrimit të viteve dhe për javë të tëra aty mblidhen grumbuj njerëzish për ta vizituar.
Pavarësisht se grumbullimet janë të ndaluara për shkak të pandemisë, duket se për këtë rast nuk përbën fare problem. Kjo gjë ka nxitur edhe reagimin e ashpër të disa qytetarëve, të cilët nuk arrjnë të kuptojnë se si lejohet një panair i tillë, që ka në qendër ushqimet, ndërsa panairi i librit u anulua dhe do të zhvillohet online.
Duam libra, jo qofte!
Pas shpërndarjes së lajmit, në rrjete sociale ka nisur një fushatë nga lexuesit, të cilët kërkojnë që po njësoj si “Fshati i festave” të organizohet edhe Panairi i Librit.
“Shpërndaje!
Ne, njerëzit që lexojmë libra, nisur nga lejimi i Panairit të Produkteve të Tiranës (produkte për të mbushur barkun) dhe njëkohësisht anulimit të Panairit të Librit, anulimit me ligj të çdo forme tubimi dhe shumë aktiviteteve të tjera, edhe ecjes me standarde të dyfishta sipas interesave, nisim fushatën online #duamlibrajoqofte. Kush e ndjen veten të cunguar, të mashtruar, të ofenduar, të rrezikuar nga injoranca strategjike që po na imponohet me ngulm, le ta shpërndajë këtë status.
#duamlibrajoqofte #duamteatër #duamkulturë #libriështënevojë #joinjorancë #mbushnimendjenjobarkun #bashkiaeturpit #qeveriaemarres #injorancastrategjike”, shkruhet në deklaratën që ka nisur të shpërndahet me shpejtësi në rrjet.
Ndër të parët që reagoi kundër kësaj çështje, ishte gazetari, Enkel Demi, i cili njihet me pseudonimin Tom Kuka nga librat që ka shkruar.
“Një vend që e bën panairin e birrës për së mbari dhe panairin e librit online, besojs se të ardhmen ka me e pas me shkumë”, ka shkruar Demi në rrjete sociale.
Panairi i Librit online sepse cilësohet i rrezikshëm, ndërsa “Fshati i Festave” jo!
Ministria e Shëndetësisë e cilësoi Panairin e Librit si një event të rrezikshëm për përhapjen e koronavirusit, ndaj u vendos që ai të mbahet online. Të gjithë botuesit shqiptarëë e kanë cilësuar këtë gjë si një sfidë të madhe për ta e lexuesit dhe ende nuk ka një plan të mirëfilltë se si do të mbahet Paniri i Librit online. Deri më tani dihet se do të ketë një platformë online për blerjen e librave dhe disa ekrane të mëdhenj nëpër kryqytet që do të pasqyrojnë eventet, por gjërat nuk janë shumë të qarta. (Kliko)
Panairi i Librit do të zgjasë vetëm 4 ditë (12-15 nëntor), ndërkohë që “Fshati i Festave”, ku mblidhen mijëra njerëz çdo ditë, do të zgjasë plot dy muaj. Si ka mundësi që ky i fundit nuk është i rrezikshëm për përhapjen e Covid-19, ndërsa Panairi i Librit është? A nuk mundej që Panairi i Librit të zhvillohej në një ambient të hapur njësoj si “Fshati i festave”? Sigurisht që mundej, por rregullatnë vendin tonë ndryshe shkruhen e ndryshe zbatohen kur vjen puna tek interesat e pushtetit!
