Shqiptarët edhe pse janë futur në një vit pandemie, përsëri tregojnë se janë një popullatë neglizhente jo vetëm ndaj kujdesit shëndetësor, por edhe ndaj masave për garantimin e tij.
Këtë gjë e tregojnë të dhënat për sigurimin mbi shëndetin, për të cilin Shqipëria është thuajse e fundit në Europë.
Një pjesë e shqiptarëve mjaftohen me sigurimet e detyruara shëndetësore në shtet, në një kohë që një pjesë e madhe as për këto nuk interesohen.
Nga ana tjetër, në Shqipëri edhe vet shteti megjithëse paguhet nga kontribuentët vendas, u ofron atyre vetëm një pjesë të shërbimeve shëndetësore nëpër spitalet publike, edhe këtë me mjaftë mangësi.
Edhe pse qeveria ka propaganduar shërbimin “shëndetësia falas”, ky i fundit i lë “në mes të rrugës” shqiptarët që kanë nevoja më të mëdha shëndetësore se sa ato baziket.
Shqiptarët paguajnë nga xhepi
Shërbimi shëndetësor “falas për të gjithë” është ende një utopi në vendin tonë. Sistemi i sigurimeve të detyrueshme shëndetësore në Shqipëri ofron zyrtarisht falas shumicën e shërbimeve, nëse pacienti ndjek një sistem të caktuar reference.
Por, për shkak të cilësisë e dobët e shërbimit, mungesës së stafi të specializuar jashtë qendrave të mëdha urbane, korrupsionit dhe kapaciteteve të pamjaftueshme për shërbime të veçanta, shpeshherë pacientët detyrohet t’i marrin pranë qendrave shëndetësore private.
Në shërbimin spitalor ka shpesh mungesë të barnave të domosdoshme, që jo rrallë të sëmurët detyrohen t’i sigurojnë dhe t’i paguajnë vetë nga xhepi.
Shembulli më i fundit është pandemia e Covid-19, ku pacientët që trajtohen në kushte shtëpie, janë të detyruar të paguajnë vetë të gjithë koston e barnave dhe kurave të tjera.
Në ekonomitë më të zhvilluara, një pjesë e mirë e nevojave për kujdes shëndetësor mbulohen nga skemat private të sigurimeve. Por në Shqipëri, shpenzimet e paguara nga kompanitë e sigurimeve janë modeste, me rreth 270 milionë lekë në 8-mujorin e këtij viti dhe rreth 436 milionë lekë për të gjithë vitin 2019.
Një sistem që as nuk ofron shërbim të mjaftueshëm shëndetësor publik dhe as nuk nxit sigurimin privat, deri tani ka prodhuar një barrë të rëndë financiare për shqiptarët.
Të dhënat e Bankës Botërore e rendisin Shqipërinë si një ndër vendet me pagesat më të larta nga xhepi i qytetarëve për shërbimet shëndetësore jo cilësore, me rreth 50% të shpenzimeve totale.
Sigurimi i shëndetit ende një luks
Ajo që po vihet re në Shqipëri sidomos në vitet e fundit, është se janë të pasurit ata që po kushtojnë gjithmonë e më shumë interes edhe tek kultura shëndetësore, apo edhe tek skemat e sigurimeve shëndetësore private.
Familjet e nivelit mbi mesataren, të trembur sidomos nga koronavirusi, kanë nisur që të shqetësohen më tepër për shëndetin e tyre, prandaj u janë drejtuar edhe skemave private të sigurimit shëndetësor.
Për tetë muajt e parë të këtij viti, shqiptarët kanë shpenzuar 536 milionë lekë ose rreth 4.3 milionë euro për sigurimin privat të shëndetit.
Të dhënat nga Autoriteti i Mbikëqyrjes Financiare, tregojnë një rritje të primeve në këtë klasë sigurimi me 13%, krahasuar me të njëjtën periudhë të një viti më parë.
Ky është një ndër produktet e pakta të sigurimit që paraqitet në rritje këtë vit, por vlerat ngelen tejet modeste, ashtu si gjithë tregu i sigurimeve vullnetare në përgjithësi.
Vitin e kaluar, shqiptarët shpenzuan më pak se dy euro për frymë, në sigurime private të shëndetit.
Nëse tërmetet e vitit të kaluar nuk sollën ndonjë rritje masive të sigurimit të pronës, as fatkeqësia e madhe shëndetësore e këtij viti, Covid-19, nuk ka sjellë përmbysje të mëdha tek sigurimet e shëndetit. Skemat e sigurimit privat të shëndetit janë pak të përdorura dhe në një pjesë të madhe ofrohen në formën e përfitimeve nga kompani të veçanta për punonjësit e tyre.
/Burimi: AMF/ GazetaReforma.com/
