Autoriteti i Konkurrencës (AK) mban peng dhe zvarrit hetimin e ankesave që bëhen për shkelje të ligjit. Një nga këto hetime lidhet me tregun e materialeve mjekësore si maska alkool, etj., që janë shumë të domosdoshme për shkak të pandemisë. Çështja nisi kur qeveria shpërndau 1.2 milionë maska të skaduara duke rrezikuar jetën e tyre e mjekëve dhe të qytetarëve para koronavirusit. Hetimi nuk është mbyllur ende, edhe pse afati procedurial është 3 muaj. Maskat që kishin ardhur nga Kanadaja dhe mbytën tregun shqiptar janë harruar, ndërsa në sirtarët e AK ka një dosje të hapur që e ka mbuluar harresa.
Hetimi
Në 18 mars 2010, nisur nga disa shqetësime në masmedia dhe ankesave të paraqitura pranë AK mbi rritjen e çmimit të materialeve paramjekësore, u vendos të hetohej tregu. Monitorimi u fokusua në tregtimin e materialeve dezifektant duarsh, alkool dhe maska, për të cilat kërkesa konsumatore ka qenë në rritje si pasojë e situatës së krijuar nga virusi COVID-19.
“Nga verifikimi në terren konstatohet se: tregu ka mungesë të materialeve në nivelin e tregtisë me pakicë (rrjeti farmaceutik) rritje e pajustifikueshme e çmimit në të gjitha nivelet e tregtimit të këtyre materialeve (depo farmaceutike dhe rrjeti i farmacive)” theksohet në relacionin mbi këtë çështje.
Në kushtet e emergjencës shëndetësore, për shkak të rrezikut të kryerjes së një dëmi të rëndë dhe të pariparueshëm për konkurrencën në tregun e shitjes me shumicë dhe pakicë të materialeve paramjekësore (dezifektant, alkool dhe maska), pasi ka të ngjarë të ketë shkelje të ligjit, për shkak të rritjes së pajustifikueshme të çmimit të tregtimit, konstaton relacioni.
Në këto kushte, AK vendosi nisjen e hetimit paraprak për farmacitë dhe depot e barnave duke vendosur: Ndalimin e sjelljes së ndërmarrjeve që veprojnë në rrjetin e tregtimit me shumicë dhe pakicë (importues, depo farmaceutike dhe farmaci) të materialeve paramjekësore, të cilat në mënyrë të drejtpërdrejtë apo të tërthortë vendosin çmime apo kushte të padrejta tregtimi ; Aplikimin e çmimeve të orientuara drejt kostos dhe publikimit e tyre në faqet zyrtare të internetit të ndërmarrjeve apo në kanalet e tjera të komunikimit.
Zvarritja
Interesat klienteliste të Autoritetit e kanë mbyllur pa vendim këtë çështje. Madje për ta mbuluar, në datën 23 shtator 2020, hapet një hetim i ri në Tregun e Barnave dhe Pajisjeve Mjekësore. “Autoriteti vlerëson nevojën e një analizë të plotë dhe gjithëpërfshirëse në tregun e barnave dhe pajisjeve mjekësorë, për të parë nëse ka kufizime, shtrembërime apo pengime të konkurrencës”, argumentohet vendimi.
Që ky institucion ka dalë jashtë kontrollit e konstaton edhe Kuvendi i Shqipërisë, i cili në rezolutën “Për vlerësimin e veprimtarisë së Autoritetit të Konkurrencës për vitin 2018”, i ka kërkuar Autoritetit “Të mbikëqyrë me prioritet dhe të dalë më rekomandime konkrete për tregjet me sensitivitet të lartë publik e ndikim social si: tregu bankar, tregu i shërbimeve spitalore dhe tregu farmaceutik,.. etj”.
/GazetaReforma.com/
