Disa ditë më parë u bë e ditur se shefja e Epidemiologjisë në Institutin e Shëndetit Publik, Silva Bino, ishte infektuar me Covid-19.
U mësua se ajo ishte shtruar prej disa ditësh në Spitalin Infektiv dhe gjendja e saj paraqitej e stabilizuar.
Sot, në një komunikim online për gazetarët, Bino ka rrëfyer eksperiencën e saj me Covid-19.
Ajo ka treguar se ka kaluar një formë të rëndë të virusit, por fatmirësisht është kuruar herët.
“COVID-19 nuk është grip. Edhe gripi është një sëmundje serioze, por COVID-19 është edhe më serioz pasi ka disa forma të rënda të vetat. Unë kalova formë të rëndë të tij, por erdha në kohën e duhur në spital. Që të parandalojmë të prekemi nga gripi dhe nga COVID-19 është i nevojshëm vaksinimi ndaj gripit. Unë jam ende në spital dhe po rikuperohem. Jam në gjendje më të mirë. Jua rekomandoj të gjithëve të vaksinohen.”- ka rrëfyer Bino.
Një pjesë e madhe e personelit shëndetësor është prekur nga koronavirusi, madje spitalet u kthyen pak kohë më parë në burim infektimi.
Mes të prekurve ka qenë edhe kreu i Urgjencës Skëndet Brataj, disa deputetë e figura të shumta publike.
