Presidenti Donald Trump njoftoi të premten se ai dhe gruaja e tij kanë rezultuar pozitivë me koronavirus, në mes të fushatës zgjedhore për zgjedhjet presidenciale.
CNN shkruan sot se, diagnoza përbën një kërcënimin të rëndë shëndetësor për një president amerikan që është 74 vjeç, dhe rrjedhimisht Trump hyn në kategorinë më të lartë të rrezikut për komplikime serioze nga sëmundja, e cila ka vrarë më shumë se 200,000 amerikanë dhe më shumë se 1 milion njerëz në të gjithë botën.
“Sonte, @FLOTUS dhe unë rezultuam pozitivë me COVID-19. Ne do të fillojmë procesin e karantinës dhe rimëkëmbjes menjëherë. Ne do ta kalojmë këtë BASHKË!”, shkroi Trump në Twitter të premten në mëngjes.
Më vonë, Zonja e Parë njoftoi në Twitter se ajo dhe burri i saj “ndiheshin mirë”.
Trump u pa për herë të fundit në publik të enjten pasdite duke u kthyer në Shtëpinë e Bardhë pas një udhëtimi për mbledhjen e fondeve në New Jersey. Ai nuk dukej i sëmurë, megjithëse nuk u foli gazetarëve ndërsa hyri në rezidencën e tij.
Në një memo të lëshuar për gazetarët rreth orës 1 të mëngjesit, mjeku i Presidentit, Komandanti i Marinës Dr. Sean Conley, shkroi se ai mori konfirmimin e testeve pozitive të enjten në mbrëmje.
“Presidenti dhe Zonja e Parë janë të dy mirë në këtë kohë, dhe ata planifikojnë të qëndrojnë në shtëpi, brenda Shtëpisë së Bardhë gjatë rimëkëmbjes së tyre,” shkroi Conley.
“Ekipi mjekësor i Shtëpisë së Bardhë dhe unë do të jemi vigjilentë dhe unë vlerësoj mbështetjen e dhënë nga disa prej profesionistëve dhe institucioneve më të mëdha mjekësore të vendit tonë,” shkroi Conley, pa sqaruar se çfarë ndihme po i ofrohej Shtëpisë së Bardhë.
“Të jeni të sigurt: Unë pres që Presidenti të vazhdojë të kryejë detyrat e tij pa ndërprerje gjatë rikuperimit, dhe unë do t’ju mbaj të azhornuar për çdo zhvillim të mëtejshëm,” shkroi ai.
Presidenti kishte thënë mbrëmjen e së enjtes vonë se kishte në plan të bënte karantinë pasi një nga ndihmesit e tij më të ngushta, Hope Hicks, doli pozitive.
/CNN
