Parku më i madh arkeologjik në vend, Butrinti, do të menaxhohet për 10 vitet e ardhshme nga një kompani e huaj angleze, e regjistruar me emin “Prince + Pearce”. Që kur ky lajm u bë publik, ekspertë të fushës, arkeolog, e studiues u shprehën kundër “Planit të Menaxhimit të Integruar”, sepse sipas tyre në asnjë shtet të botës nuk ekziston mundësia që një aset kombëtar të menaxhohet nga një kompani e huaj.
Auron Tare ka qenë që në krye të herës kundër planit, duke u shprehur se shumë mirë mund të ishin përzgjedhur kompani shqiptare për menaxhim, që njihet si “fondacione”, njësoj si “P + P”. (Kliko këtu për intervistën)
“Duhet të jetë një fondacion shqiptar për të menaxhuar Butrintin. Keni dëgjuar ndonjëherë që Akropoli të menaxhohet nga një fondacion i huaj amerikan per shembull? Nuk ka”, është shprehur Tare në 2019-tën, në një intervistë për “Report TV”, sepse ka vite që flitet për planin e integruar të menaxhimit të Butrintit.
Por përveç kësaj, ajo që është akoma dhe më shqetësuese është kompania që do të menaxhojë Parkun Kombëtar të Butrintit.
Kush është “Prince + Pearce”?
Në kompaninë “Prince + Pearce” ka vetëm dy të punësuar që janë edhe ortakë, David Prince dhe Simon Pearce, të dy me origjinë angleze. Pearce është bërë pjesë e kompanisë në vitin 2010 dhe thuhet se është me profesion arkitekt, ndërkohë që Prince është bashkuar në 2011-tën dhe punon si konsulent kërkimesh.
Ëshë i çuditshëm fakti që një kompani që do të menaxhojë Parkun më të madh Arkeologjik të Shqipërisë ka të punësuar vetëm dy persona, për të cilët nuk ekziston thuajse asnjë gjurmë digjitale. Nëse bën një kërkim në rrjet për Simon Pearce dhe David Prince, nuk të del asnjë informacion në lidhje me punët që ata kanë bërë në profesionet e tyre.
E vetmja e dhënë që mund të gjendet për ta, është në website-n e kompanisë “Prince + Pearce”, në të cilin shkruhen pothuajse të njëjtat gjëra për dy ortakët. Për ta thuhet se kanë mbi 30 vite eksperiencë pune, që nuk jepet e dëshmuar, sepse thuhet se detajet e CV-së së tyre mund të jepen vetëm me anë të një kërkese.
Për më tepër faqja e kompanisë duket mjaft e thjeshtë, aq sa mund të dizenjohet edhe nga dikush që ka marrë leksionet e para si web developer. Informacioni që jepet është i vakët dhe për çdo punë që supzohet se ata kanë ndërmarrë nuk jepet asnjë lloj detaji.
Në bazë të të dhënave nga “Open Corporates” kompania angleze e ka ndërruar dy herë emrin, në fillim e ka pasur “CULTURAL HERITAGE PROFESSIONALS LIMITED” dhe më pas “Apply Managment Limited”.
Asetet qesharake të kompanisë
Më qesharkja nga të gjitha janë asetet që disponon kjo kompani. Sipas të dhënave nga e njëjta faqe bëhet e ditur se në vitin 2016-të kompania ka pasur në llogarinë bankare vetëm 1.692 paund.
Do të thotë se vetëm me dy punonjës dhe me kaq pak të ardhura, kompania “Prince + Pears” ka hartuar planin e menaxhimit dhe në 10 vitet e ardhshme do të ketë në dorë të gjithë parkun e Butrintit.
Duke qenë se është një nga sitet arkeologjike më të vizituara në Shqipëri dhe më së shumti nga turistë të huaja, Parku Arkeologjik i Butrintit siguron mbi 1 milionë dollarë fitime në 1 vit. Nëse bëjmë krahasimin me asetet e kompanisë angelze, kuptohet se ajo nuk i ka kapacitetet e duhura, në të gjitha aspektet, për menaxhimin e Butrintit.
