Mjeku nga Shkodra, Eno Kanani, duket se është personi i radhës që i shtohet listës së të infektuarve me Covid-19 që nisen për kurim në Turqi për një mjekim të specializuar. Falë një fushate online u arrit të grumbulloheshin fondet e nevojshme për mjekun duke siguruar një charter, me të cilin do të niset sot për në Turqi.
Teksa spitalet po mbushen me të sëmurë përtej kapaciteteve të tyre, të shumtë janë personat që janë larguar drejt Turqisë (apo edhe vendeve të tjera) për të marrë shërbimin e nevojshëm mjekësor që vendi ynë nuk e ofron.
Padyshim që këtu nuk flasim për shqiptarët e thjeshtë, siç janë për shembull punëtorët e fasonerive që kanë punuar edhe në pikun e pandemisë pasi të ardhurat e tyre nuk ua mundësojnë diçka të tillë.
Kush është larguar deri tani drejt Turqisë?
Disa javë më parë, gazetari Arsen Rusta raportoi se të pakën 20 persona janë larguar nga Rinasi me charter gjatë 3 muajve të fundit, për t’u kuruar jashtë vendit. 20 të infektuarit u kanë besuar jetën mjekëve të Italisë dhe Turqisë. Ndërkohë, çdo ditë rriten aplikimet për kurime jashtë. Disa nga emrat që janë bërë publik deri tani janë:
Vilma Nushi, milionerja që ka në “dorë” gjithë shëndetësinë shqiptare me të ashtuquajturin projekti i Check Up. Vilma nuk pranon të marrë shërbime falas në vendin që i ka besuar asaj shëndetësinë e laboratoret e analizave, por u transportua drejt Turqisë.
Deputeti i Opozitës Parlamentare Enver Roshi.
Ish-kryetari i bashkisë së Lushnjes Albert Sanxhaku, i cili fatkeqësisht nuk e fitoi betejën ndonëse u transportua në shtetin turk.
Shefqet Kastrati ka qenë ndër të parët që është larguar nga vendi jonë, pasi u infektua nga Covid-19 gjatë muajit mars.
Mes të përfolurve është edhe kreu i Bashkisë Tiranë, Erion Veliaj, por ky i fundit e ka mohuar diçka të tillë.
Çfarë i mungon sistemit shëndetësor shqiptar që fatlumët e gjejnë në Turqi, ndërsa shqiptarët e thjeshtë e paguajnë me jetë?
Sipas asaj që kanë deklaruar disa nga mjekët më të njohur të vendit tonë bëhet fjalë për një pajisje, që quhet ECMO, një pajisje e kujdesit intensiv, shumë e vlefshme për të shpëtuar jetët e pacientëve të intubuar. Kjo pajisje kushton rreth 60-70 mijë euro dhe konsiderohet si pajisja e fundit e “mrekullive” në mjekësinë moderne.
Ç’është ECMO?
Oksigjenimi i Membranës Ekstracorporale (jashtë qelizore) ECMO është një pajisje që pompon dhe oksigjenon gjakun e një pacienti jashtë trupit, duke e mbajtur një person në jetë për ditë, javë ose muaj, edhe kur zemra ose mushkëritë e tyre nuk funksionojnë. Kur një paicent trajtohet më ECMO, gjaku rrjedh përmes tubit në një mushkëri artificiale në makinë, që shton oksigjen dhe nxjerr dioksid karboni, atëherë gjaku ngrohet në temperaturën e trupit dhe pompohet përsëri në trup.
Disa kohë më parë shefi i Kardiokirurgjisë në QSUT, Edvin Prifti tha në një intervistë se kjo pajisje bën oksigjenimin artificial të gjakut, duke lënë në qetësi mushkëritë, në këtë mënyrë ndihmon pacientët e intubuar nga Covid-19. Sipas Priftit 50% të të sëmurëve që janë në ECMO dhe janë me Covid kanë arritur të mbijetojnë.
Ndër të tjera ai u shpreh:
Në varësi shkon nga 60-70 mijë euro. Në një emision Arben Gjata na e premtoi se kishte një premtin nga universiteti i Barit për të bërë disa dhurata për aparate të tilla, por më pas nuk e di çfarë u bë.
Mësuesi nga Shkodra që humbi jetën nga Covid-19 pasi nuk arriti të shkonte në Turqi
Gazion Rusi, mësues në Medresenë e Shkodrës ka ndërruar jetë për shkak të komplikacioneve nga Covid-19 disa javë më parë. Rusi, mësues prej vitesh, ishte shtruar në spitalin Covid2, (Shefqet Ndroqi), për mbi 10 ditë ku ishte edhe i intubuar.
Baba i tri vajzave, Rusi humbi betejën pavarësisht solidarizimit nga miqtë, familjarët e të afërmit. Ata mblodhën një shumë prej 38 mijë euro në vetëm 12 orë për ta dërguar në Turqi për kurim, por Rusi nuk ia doli dot të shkonte në kohë. Nëse ai do i kishte mundësitë financiare mund të shkonte më herët e të kurohej.
Ministria e Shëndetësisë nuk investon dot?
Mjeku ongolog Henrik Zotaj në një shkrim në rrjetet sociale shprehet se një numër prej rreth 5-10 pajisjesh të tilla ECMO, do ishin jetë-shpëtuese për një numër pacientësh që me opsionet e tjera të terapisë intensive nuk do ia dilnin dot, ta fitonin betejën me Covid-19.
Ai shprehet se duke përdorur ECMO, në terapinë intensive një numër i caktuar pacientësh mund t’ia dalin të shpëtohen.
Me një llogari të thjeshtë, për 10 pajisje me nga 70 mijë euro(referuar deklaratës së Edvin Priftit) do duheshin 700 mijë euro. Nëse iu duket një shifër e madhe, iu kujtojmë se gjatë periudhës së epidemisë, “Farma Net Albania” ka përfituar nga institucionet shtetërore, rreth 3.5 milion euro tendera kryesisht për blerje maskash, ku të gjithë janë zhvilluar me negocim dhe pa garë.(Lexo këtu)
ECMO, mund të ishte pjesë e terapisë intensive në shërbimet tona reanimatore. Kjo pajisje mund ishte shumë e vlefshme jo vetëm, në spitalet publike por, dhe ato jo-publike.
Për shpëtimin e jetës, gjithçka ia vlen, por kjo nuk vlen për politikën shqiptare!
