Janë shënuar dy viktima nga koronavirusi në 24 orët e fundit. Vëllai i kreut të “Yldon Media Group”, Ylli Ndroqi, ka ndërruar jetë mëngjesin e sotëm, pasi ishte i shtruar prej disa ditësh në spitalin COVID-2, “Shefqet Ndroqi”.
Lajmin e trishtë e ka dhënë vetë Ndroqi, përmes një dedikimi në mediat sociale ku shprehet se tashmë ndodhet vetëm dhe se ikja e tij e ka bërë të ndihet bosh.
“Përse më braktise vëllai im i shtrenjtë. Unë isha i fortë sepse luftoja me vëllain tim. Isha gëzim sepse vëllai im nuk më la kurrë në errësirë. Ishim unë dhe ti. Çfarë do bëhet me mua tani Luli im? Vëllai im, gjysma ime… Unë isha Ylli sepse kisha Lulin. Përse vëllai im përse u ngjite lart kaq shpejt përse? Përse Zoti të mori, përse na le kështu në bosh. Si do ia bëj vëllai im, si do ia bëj unë tani pa ty?…”, shkruan Ndroqi në mesazhin e ndjerë për të vëllain”, shkruan Ndroqi.
Ndërkohë, COVID-19 i ka marrë jetën edhe ish-kryebashkiakut të Lushnjes. Albert Sanxhaku është ndarë nga jeta mbrëmjen e djeshme në një spital në Turqi, ku prej disa javësh po kurohej, pasi u infektua me COVID.
Sanxhaku ka qenë kryetar bashkie në qytetin e Lushnjes në vitet 2007-2011. Ai i fitoi zgjedhjet nën siglën e Lëvizjes Socialiste për Integrim dhe ka mbajtur edhe disa poste të tjera të rëndësishme, së fundmi zëvendës i fondit të kujdesit shëndetësor.
