Koronavirusi i ka marrë jetën efektivit të uniformave blu në qytetin e Shkodrës.
Safet Morina, i cili mbante postin e komandantit të qarkullimit rrugor në qytetin e Shkodrës, ka ndërruar jetë pas infektimit me COVID-19.
Ai ndodhej i intubuar në spitalin COVID2 në Tiranë prej dy javësh dhe pavarësisht përpjekjeve të mjekëve nuk ka mundur dot që të fitojë betejën me virusin.
Nuk dihet nëse efektivi vuante nga sëmundje bashkëshoqëruese, ndërsa Ministria e Shëndetësisë ende nuk ka dalë me një reagim zyrtar.
Dje në vend u shënua numri më i lartë i rasteve të reja të infektuara me COVID-19. 140 është numri i personave që janë konfirmuar pozitiv me koronavirus gjatë 24 orëve të fundit, ndërsa fatkeqësisht 5 persona të tjerë kanë humbur jetën, duke e çuar në total numrin e viktimave në 205.
