Kanë kaluar 5 muaj që kur Covid-19 mbërtheu vendin tonë duke shkaktuar një krizë shëndetësore dhe ekonomike si në çdo vend tjetër. Epidemia që solli me vete vdekje e varfëri për njerëzit, nga ana tjetër duket të jetë një periudhë shumë e mirë për qeverinë shqiptare dhe shumë qeveria të tjera në botë, si për shembull në Britani të Madhe (KLIKO) për të vijuar korrupsionin dhe zhvatjen e qytetarëve.
Një nga karakteristikat e menaxhimit të Covid-19 në vendin tonë është TENDERIMI. Nga marsi e deri tani janë raportuar dhjetëra raste abuzive, kryesisht nga Ministria e Shëndetësisë, që nuk e ka ndalur fare dorën këto muaj, teksa prapaskenat e tenderave të kryera dalin si kërpudhat pas shiut.
Tenderi i Manastirliut për Skanera dhe Rezonancë, dyshime për fitues të paracaktuar
Jo më larg se një javë më parë, u raportua se Ministria e Shëndetësisë po planifikon blerjen e një aparati Rezonancë Magnetike dhe 3 skanera CT, me vlerë totale rreth 2.4 milionë euro.
Mirëpo, dokumentat e tenderave krijojnë dyshime të forta se ato janë të paracaktuar që në nisje të tyre. Në rastin e Rezonancës Magnetike, Ministria e Shëndetësisë ka vendosur specifikime të ulta, që i takojnë një teknologjie të prodhuar rreth 15 vjet më parë. Në Shqipëri, aparatura me këto specifikime i ka një kompani e vetme.
Po ashtu, për Skanerat CT, Ministria e Shëndetësisë ka hartuar listën e specifikimeve teknike, të cilat duket se i plotëson po e njëjta kompani. Në këtë rast, specifikimet janë vendosur për skanera të cilësisë së lartë, por brenda tyre ka detaje përjashtuese për të gjithë firmat e tjera që operojnë në tregun e aparaturave mjekësore në Shqipëri. “Përjashtimi” konsiston në faktin që asnjëra prej kompanive nuk plotëson 100 përqind specifikimet teknike të vendosura në faqe të tëra me numra. Përveç njërës. (Lexo këtu)
Edhe 1 vit Covid-19! Ministria e Shëndetësisë tender për masa mbrojtëse deri në shtator 2021!
Ministria e Shëndetësisë në vendin tonë është një hap para të tjerave dhe po përgatitet që Covid-19 të shtrihet edhe për një vit tjetër deri në shtator të 2021. Të paktën kjo është ajo se çfarë tregon tenderi i hapur me vlerë rreth 5.5 milion euro, ku kërkon blerjen e materialeve mbrojtëse për përballimin e pandemisë së Covid-19.
Tenderi është hapur në 14 korrik dhe ka lënë afat deri në 28 gusht për paraqitjen e ofertave dhe më pas përzgjedhjen e fituesit ku sipas kushteve të kontratës, ai duhet te furnizojë për 12 muaj Ministrinë e Shëndetësisë dhe institucionet shëndetësore me pajisje mbrojtëse personale për përballimin e situatës së Covid-19. Mirëpo, në realitet ne nuk po shohim se çfarë po ndodh me pajisjen e institucioneve me mjete mbrojtëse sepse çdo ditë raportohen për punonjës të prekur nga virusi. Ndërsa në raste të tjera, si për shembull në rastin e Ministrisë së Infrastrukturës mbahen të fshehta. (Lexo këtu)
Kompania e maskave ‘të florinjta’, që fitoi miliona lekë nga taksat e shqiptarëve në kohë epidemie
Ju kujtohet “Farma Net”, kompania farmaceutike që gllabëroi nga buxheti i shtetit miliona lekë falë tenderave? “Iconstyle.al” ka publikuar disa herë prapaskenat e tenderave të Sokol Topçiu gjatë epidemisë.
Për rikujtesë, më 20 mars Operatori i Shpërndarjes së Energjisë Elektrike (OSHEE), ka shpallur “Farma Net” fituesin e tenderit për blerjen e maskave respiratore me valvul FPP1, me një shumë prej 12.6 milionë lekësh të rinj. Tenderi u hap me 12 mars dhe u mbyll më 17 mars, ndërsa fitues u shpall “Farma Net Albania”, një rrjet i njohur farmacish në vendin tonë.
Tenderi u realizua pa njoftim dhe OSHEE përdori 12.6 milion lekë nga paratë e taksapaguesve shqiptarë, për të blerë maska me valvul të llojit FPP1. Pas një kërkimi në treg, rezulton se një maskë e tillë në një farmaci në Tiranë, kushton 850 lekë. Me një llogari të thjeshtë, rezulton se OSHEE ka porositur mbi 14 mijë maska, numër ky shumë i madh në krahasim me numrin e punëtorëve.(Lexo këtu)
“Farma Net Albania” ka vijuar të pasurohet edhe më tej, pasi ka fituar edhe dy tendera të tjerë për shumën e mbi 100 mijë eurove, sërish për pajisjen me maska të punonjësve të Postës Shqiptare dhe OSHEE. Gjatë periudhës së epidemisë, kjo kompani ka përfituar nga institucionet shtetërore, rreth 3.5 milion euro tendera kryesisht për blerje maskash, ku të gjithë janë zhvilluar me negocim dhe pa garë.(Lexo këtu)
Tender urgjent me magazinat plot
Përmes një vendimi më 19 mars, qeveria mori përsipër të asistonte familjet në nevojë gjatë izolimit nga pandemia, duke dërguar në shtëpitë e tyre pagesat mujore të ndihmës ekonomike, paketat ushqimore dhe jo-ushqimore minimale, barnat e rimbursueshme si dhe ato me pagesë. Një Komision Qendror për Ofrimin e Asistencës u ngrit gjithashtu, i kryesuar nga ministja e Mbrojtjes, Olta Xhaçka. Një nga detyrat ishte përcaktimi i masës së produkteve ushqimore dhe jo-ushqimore që do t’u shpërndahej familjeve në nevojë.
Në të njëjtën ditë me vendimin e qeverisë, Ministria e Mbrojtjes hapi një tender me procedurë të përshpejtuar me vlerë 105.7 milionë lekë [800 mijë euro] për blerjen e paketave ushqimore dhe përzgjodhi përmes negocimit të drejtpërdrejtë, kompaninë maqedonase “Eurovia”. Megjithatë, në kohën kur Ministria e Mbrojtjes po zhvillonte tenderin me urgjencë për blerjen e produkteve ushqimore, magazinat e Rezervave të Shtetit në Lundër ishin plot. Një dokument i siguruar nga BIRN tregon se në fillim të pandemisë gjendeshin të magazinuara në Lundër 400 ton miell, 80 ton oriz, 80 ton sheqer, 70 ton makarona, 50 ton vaj, 50 ton fasule, 20 ton konserva mishi, 5 ton kripë, 30 ton detergjentë dhe 30 mijë copë sapunë. Pas fitimit të tenderit, kompania “Eurovia” dorëzoi 30 mijë pako ushqimore, por ato nuk iu shpërndanë menjëherë shtresave në nevojë. (Lexo këtu)
