Ministria e Shëndetësisë po përgatitet për të hapur spitalin COVID 3.
Ky lajm vjen pas rritjes së numrit të pacientëve të shtruar aktualisht në dy spitalet, tek Infektivi dhe te ish-Sanatoriumi.
Report Tv bën me dije se ish- Urgjenca kirurgjikale në QSUT po përgatitet për t’u kthyer në spital ku do të trajtohen të infektuarit me koronavirus.
Rekrutimet për stafin që do të shërbejë në këtë spital kanë nisur dhe pjesë e tij do të bëhen bluzat e bardha që shkuan dhe u trajnuan në Itali për 1 muaj.
Emri që lakohet më së shumti për drejtimin e këtij spitali, i cili fillimisht do të ketë 40 shtretër, është mjeku Arjan Harxhi.
Deri dje, në spitalin e Infektivit, ishin të shtruar 90 pacientë, ndërsa te “Shefqet Ndroqi” janë rreth 190, ku 50 prej tyre janë pozitivë me koronavirus ndërsa pjesa tjetër negativë, por kanë shfaqur pneumoni.
Në 24 orët e fundit janë konfirmuar dhe 130 raste të reja me Covid-19, pas 546 testimeve të kryera. Po ashtu kanë humbur jetën dhe 4 qytetarë, dy që ishin të shtruar në Spitalin Infektiv dhe dy të tjerë tek “Shefqet Ndroqi”.
Nëse do të vijohet në këto ritme alarmante, është planifikuar edhe hapja e spitalit COVID 4, në godinën e një ish- universiteti privat.
