Ditën e sotme, qeveria ka marrë masa të ashpra për të luftuar përhapjen e COVID-19, dhe ka vendosur të ndalojë hapjen e klubeve të natës, diskove dhe Lounge Bareve apo shërbimeve të ngjashme si në ambiente të hapura ashtu edhe në ato të mbyllura.
Në rast shkelje të këtij vendimi bizneset do të dënohen me 30 milionë lekë të vjetër gjobë dhe me pezullim të aktivitetit deri në 1 vit. (Lexo këtu)
Ky vendim ngriti pronarët e bareve, lokaleve, klubeve, artistë e qytetarë në një protestë para Kryeministrisë që nisi në orën 20:00 e vijon ende.
Sipas protestuesve me këtë akt normative po i hiqet buka shumë punonjësve që punojnë natën në këto subjekte. Ata kërkojnë që qeveria të tërheqë Aktin Normativ që nuk i lejon ata të shërbejnë pas orës 20:00. Biznesmenët kanë thënë se ata janë pro çdo protokolli dhe shtojnë se i respektojnë masat dhe vendimi i qeverisë i godet ekonomikisht.
Me moton “muzika nuk vret” dhjetëra persona u mblodhën para institucionit të qeverisë, ndërkohë që ka ndërhyrë edhe policia.
Kjo e fundit ka ndërhyrë dhe ka kërkuar që protesta të shpërndahet, madje në disa momente ka pasur dhe tensione mes tyre dhe protestuesve, pasi këta të fundit i kanë shtyrë dhe u kanë kërkuar që të largohen. Blutë kanë nisur edhe me shoqërimet, por ende nuk janë bërë me dije emrat.
Kujtojmë se me një vendim të marrë nga qeveria muajin e kaluar, ndalohen grumbullimet dhe tubimet për shkak të pandemisë.
(Fotot e marra nga Dosja.al)
