Si në vendin tonë, edhe në Kosovë gjendja e Covid-19 vazhdon të jetë e rënduar ndërsa së fundmi “Gazeta Express” ka raportuar për një infektim në masë të zyrtarëve në Ministrinë e Punëve të Brendshme.
Më saktë, 104 persona janë infektuar me koronavirus 20 prej të infektuarve janë staf civil, katër zyrtarë nga Kabineti i Ministrit Agim Veliu dhe 80 zyrtarë policorë.
Sipas njoftimit, vetëm gjashtë zyrtarëve policorë ndodhen në spital për trajtim, ndërsa pjesa tjetër është izoluar në shtëpi.
“Deri me sot në Ministrinë e Punëve të Brendshme dhe Agjencitë e MPB-së, gjithsej janë të infektuar 104 zyrtarë me Covid -19, ku nga ta 20 zyrtar janë nga stafi civil, 4 zyrtarë nga kabineti i ministrit si dhe 80 janë zyrtarë policor. Sipas raportimeve gjendja e tyre është stabile ku të gjithë të infektuarit janë të vetë izoluar në shtëpitë e tyre, në përjashtim të 6 zyrtarëve policor që gjenden në spital për trajtim. MPB është e informuar se gjendja e tyre është stabile për momentin. Po ashtu, disa zyrtarë të cilët janë raste të kontaktit me persona e infektuar me COVID-19, janë në vetë izolim por pa simptome. Ju njoftojmë që MPB është duke punuar me staf esencial sipas rekomandimeve të IKSHPK-së,”- thuhet në njoftim.
Deri tani, Kosova numëron 5237 raste të konfirmuara me Covid-19 dhe 113 jetë të humbura.
