Në një kohë që Ministria e Shëndetësisë bën paralajmërime për përhapjen e virusit COVID-19 edhe nëpër institucione, një tjetër vatër e virusit është identivikuar në një nga institucionet më të rëndësishme në vend!
Burime për iconstyle.al bëjnë me dije se për shkak të COVID-19 është karantinuar një drejtori e tërë në Ministrinë e Infrastrukturës dhe Energjisë. Bëhet fjalë për Drejtorinë e Energjisë së Rinovueshme, punonjësit e së cilës janë karantinuar për 14 ditë.
Kryetari i Dhomës së Tregtisë dhe Industrisë së Tiranës, i cili pak ditë më parë rezultoi pozitiv me COVID-19, ka infektuar drejtoreshën e Energjisë së Rinovueshme, dhe në efekt zinxhir është infektuar i gjithë stafi. Por pavarësisht se punonjësit e drejtorisë janë karantinuar tashmë, mënyra sesi është menaxhuar kjo situatë lë për të dëshiruar.
Burimet për icostyle.al bëjnë me dije se nuk është bërë një lajmërim për punonjësit e tjerë të ministrisë që i ndan vetëm një korridor nga kjo vatër infeksioni. Kjo ka rritur dyshimet për kontaktet që ata mund të kenë pasur me personat që aktualisht janë në karantinë.
Në tentativë për ta mbajtur të fshehtë një gjë të tillë, Ministria e Infrastrukturës nuk ka bërë asnjë lajmërim për stafin jashtë Drejtorisë së Energjisë së Rinovueshme, në mënyrë që të merreshin masat e duhura të distancimit apo testimit.
Në këtë mënyrë, ministrja Belinda Balluku ka zgjedhur të heshtë përpara opinionit publik, në vend që të bëhej transparencë dhe kjo nuk është hera e parë. Pak kohë më parë, Gazeta Reforma bënte me dije se një këshilltare e ministres së Infrastrukturës dhe Energjisë ishte karantinuar për shkak se një anëtar i familjes së saj kishte rezultuar pozitiv dhe stafi ishte alarmuar.
Vetëm sot Ministria e Shëndetësisë bëri me dije se ka pasur 71 raste pozitive me COVID-19, dhe 3 viktima në 24 orët e fundit! Rikthimi i shifrave të larta të të prekurve nga koronavirusi në Shqipëri ka rindezur shqetësime të shumta, duke marrë në konsideratë edhe pamundësinë e institucioneve shtetërore për të kryer testimet e nevojshme.
OBSH paralajmëroi pak ditë më parë se e keqja nuk ka ardhur ende, dhe u bëri thirrje qeverive që të ndiqnin shembujt e Gjermanisë, Koresë së Jugut dhe Japonisë, të cilat mbajtën nën kontroll shpërthimin përmes politikave që përfshinin testimet dhe gjurmimet e rrepta.
Por me sa duket në Shqipëri po ndodh e kundërta, rastet jo vetëm që nuk po gjurmohen, por po fshihen!
/Iconstyle.al
