“Më e keqja nuk ka ardhur ende!”
Ky është paralajmërimi i frikshëm i Organizatës Botërore të Shëndetit (OBSH), në lidhje me pandeminë Covid-19, gjashtë muaj nga shpërthimi i virusit në Kinë.
Kreu i OBSH-së Tedros Adhanom Ghebreyesus tha se virusi do të prekë shumë më tepër njerëz nëse qeveritë nuk fillojnë të zbatojnë politikat e duhura.
Mesazhi i tij është i thjeshtë: “Testim, Gjurmim, Izolim dhe Karantinë”.
Më shumë se 10 milionë raste janë regjistruar në të gjithë botën që kur koronavirusi u shfaq në Kinë në fund të vitit të kaluar. Numri i pacientëve që kanë vdekur tani është mbi 500,000. Gjysma e tyre kanë qenë në SHBA dhe Evropë, por Covid-19 po rritet me shpejtësi në Amerikë.
Virusi po prek gjithashtu Azinë e Jugut dhe Afrikën, ku nuk pritet të arrijë kulmin deri në fund të korrikut.
Tedros tha një konference virtuale të hënën se realiteti i vështirë që po përjetojmë nuk është as afër fundit:
“Ne të gjithë duam që kjo të përfundojë. Të gjithë duam të vazhdojmë me jetën tonë. Por realiteti i vështirë është se nuk është as afër fundit. Megjithëse shumë vende kanë bërë një përparim, globalisht pandemia po shpejton”.
“Me 10 milionë raste infektimesh tani dhe gjysmë milioni vdekje, nëse nuk adresojmë problemet që kemi identifikuar tashmë në OBSH, mungesën e unitetit kombëtar dhe mungesën e solidaritetit global dhe botës së ndarë, e cila në të vërtetë po e ndihmon virusin të përhapet … më e keqja nuk ka ardhur ende. Më vjen keq ta them këtë, por me këtë lloj ambienti dhe këto kushte, kemi frikë nga më e keqja.
Ai gjithashtu nxiti më shumë qeveri që të ndiqnin shembujt e Gjermanisë, Koresë së Jugut dhe Japonisë, të cilat mbajtën nën kontroll shpërthimin përmes politikave që përfshinin testimet dhe gjurmimet e rrepta.
Por çfarë po ndodh në Shqipëri?
Rikthimi i shifrave të larta të të prekurve nga koronavirusi në Shqipëri ka rindezur shqetësime të shumta, duke nisur me frikën e një izolimi të ri për të frenuar përhapjen e virusit, si dhe pamundësinë e institucioneve shtetërore për të kryer testimet e nevojshme.
Kapacitetet e ISHP janë mjaft të kufizuara dhe kjo u pa në një dokument ku i bëhej thirrje emergjente Ministrisë së Shëndetësisë, që testimet të kryen në laboratorë jashtë, duke nënkuptuar ata privatë.
Përtej nevojave epidemiologjike, këto testime do të kenë vlerë për edhe për dokumentacion shoqërues, për udhëtimin jashtë shtetit, i cili për momentin mbetet si një ëndërr e largët.
/Përshtatur nga BBC
