Pas ditësh të tëra me shifra rekord të infektuarish, më në fund ka rënë numri i të prekurve nga koronavirusi në 24 orët e fundit në vend.
Sipas informacioneve mësohet se sot janë regjistruar 50 raste të reja, shifër e cila është e ulët krahasuar me ditët e fundit ku u shënua dhe rekordi me 82 të prekur (të martën).
Ndërkohë që pritet përditësimi i Ministrisë së Shëndetësisë, bluzat e bardha dhe autoritetet kanë bërë thirrje të vazhdueshme për respektimin e distancës sociale dhe masave të mbrojtjes.
Sot, ministrja e Shëndetësisë publikoi një video me thirrjen e prof. Najada Çomo, shefe e Shërbimit Infektiv në QSUT, e cila fliste për gjendjen e të infektuarve në vend.
“Të shtruarit në shërbimin infektiv po shtohen, ndaj të nderuar qytetarë, kjo është situatë për t’u shqetësuar për shëndetin tuaj. Ne jemi në krye të detyrës për t’ju shërbyer, por keni një detyrim madhor, të qëndroni sa më larg nga personat e sëmurë, ulni në minimum frekuentimin e ambienteve publike dhe përdorni maskën” !
Dje, kryeministri Edi Rama paralajmëroi se nëse nuk do të bëjmë kujdes, pasojat e një mbylljeje të dytë do të ishin të rënda.
Kreu i qeverisë shtoi se nëse numri i të infektuarve vijon që të rritet, mund të mbyllet vendi sërish.
Rama tha se nuk do të tolerohen më asnjë biznese që nuk respektojnë protokollin e sigurisë dhe përveç gjobave do të aplikohet dhe heqja e lirisë, pasi nuk mund të lejohet cenimi i jetës së qytetarëve.
Gjithashtu, nuk do të lejohen grumbullimet dhe do të penalizohen dhe qytetarët në rrugë nëse nuk respektojnë distancimin social (lexo këtu).
