Dy ditë më parë, një artikull i publikuar nga “iconstyle.al” lidhur me largimin e Ben Blushit nga drejtimi i “Top Channel” (lexo këtu) bëri xhiron e rrjetit.
Në lajmin në fjalë, burime të “iconstyle.al” konfirmonin dhe vijojnë të konfirmojnë dhe sot atë që në “Top Channel” diskutohet prej ditësh: që Blushi do të lërë pozicionin e tij si drejtor i përgjithshëm i televizionit dhe vendin e tij do ta marrë Ledion Liço.
Mirëpo kaq mjaftoi që disa media në zë në vendin tonë të hidheshin në një sulm të rrëmbyeshëm për të përgënjeshtruar lajmin, a thua se u prekën pikërisht aty ku nuk duhej.
Qartazi, lajmi në fjalë ka djegur dhe jo pak, duke i bërë mbështetësit e Blushit të përfytyrojnë skenare imagjinare e madje të aludojnë për komplote politike.
Po ajo që bën përshtypje është se në fakt, ndonëse lajmi është publikuar nga “iconstyle.al” dhe pjesa më e madhe e mediave që e kanë ritransmetuar e kanë nënvizuar një gjë të tillë, gazeta pjesë e grupit “Top Media” zgjedh t’i hakërrehet dy pronarëve të mediave online të cilët në të shkuarën kanë qenë pjesë e “Top Channel” dhe tashmë në portalet përkatëse kanë përcjellë lajmin e largimit të drejtorit.
Në një hakmarrje qesharake mediatike, gazeta e “Top Channel” quan madje njërin prej tyre “një portal zonjushash”, ndonëse në këtë të fundit, lajmi për largimin e Blushit në fund të artikullit mohohej , duke iu referuar burimeve në “Top Channel”.
Kështu, edhe nën presionin e qartë të artikullit denigrues, media në fjalë u detyrua më tej ta quante një “thashethem portalesh” artikullin që vetë zgjodhi ta publikonte, duke iu referuar sërish burimeve të ashtuquajtura të sigurta.
Por teksa do ishte e udhës që këto burime kaq të sigurta të dilnin publikisht ta mohonin lajmin e largimit të Blushit nga “Top Channel” meqë nuk paska as vend për dyshim.
Ne do të vijojmë të presim shtatorin për të mësuar nëse nisja e sezonit të ri televiziv do të bëjë ndokënd të pendohet për deklaratat e nxituara.
