Tirana është vatra më e nxehtë e virusit, pas të dhënave ditore të Ministrisë së Shëndetësisë, sipas së cilës, 25 raste me COVID-19 janë identifikuar vetëm në kryeqytet!
Numri më i madh i të prekurve ka rezultuar në një Call Center në Tiranë, ku janë infektuar minimumi 15 vetë. Ministria nuk dha asnjë detaj në lidhje me këtë burim infeksioni, por Gazeta Tema shkruan se bëhet fjalë për Call-Centerin ‘CTA Groups’, që ndodhet në ish-Uzinën Tirana në zonën e Laprakës.
Burime pranë gazetës bëjnë me dije se call-centeri në fjalë ka operuar i pashqetësuar gjatë të gjithë kohëzgjatjes së gjendjes së emergjencës dhe se rastet e shumta të të infektuarve koronavirus, janë dukshëm rezultat i mospërlljes së masave qeveritare në kushtet e pandemisë.
Autoritetet shtetërore po vijojnë punën për gjurmimin e të infektuarve nga kjo vatër e re e cila përbën thuajse 70% të rasteve të reja me koronavirus gjatë dy ditëve të fundit.
Ndërkohë sot, ka ndërruar jetë një tjetër pacient nga Tirana, pasi ishte shtruar prej ditësh në terapi intensive pas infektimit me COVID-19. 69-vjeçari nga Tirana, me inicialet S.K., është viktima e 33 që ka humbur betejën me koronavirusin.
Në 24 orët e fundit janë shtuar 25 raste të reja me COVID-19 (24 në Tiranë dhe 1 në Durrës) dhe aktualisht po trajtohen 17 pacientë, nga të cilët 3 janë në terapi intensive.
/gazetatema.net
