Teksa ishte i ftuar në një intervistë për “Dita Jonë” në A2, Kreu i Urgjencës Kombëtare, Skënder Brataj, është shprehur i shqetësuar për rrezikun që mund t’i kanoset sërish shqiptarëve në fund të këtij muaji.
Mjeku tregoi se është i shqetësuar pasi në fund të muajit mund të kemi rritje të të prekurve me Covid-19, duke qenë se qytetarët nuk po i zbatojnë masat siç duhet.
“Rezultatet e tanishme janë si rezultat i masave të marra, ndërsa efekti i lirimit të masave do të ndjehet nga fundi i muajit dhe fillimi i qershorit, sepse inkubacioni i virusit shkon deri në 14 ditë. Për fat të keq, njerëzit nuk po i respektojnë rregullat. Mosrespektimi i tyre duket si diçka normale. Është krijuar ajo ideja se Covid-19 nuk ishte diçka jo reale, por nuk është aspak kështu. Është frikë se sa do të jetë numri i të infektuarve pas dy javësh. Luhatja aktuale e shifrave është normale, pasi ka vetëm vatra, aktualisht në fasoneri në Durrës. Nuk ka infeksion në masë në Shqipëri dhe kjo erdhi si pasojë e izolimit.
Politizimi është faktori më i keq. Në muajin e parë askush nuk guxonte të dilte, duke ndjekur edhe lajmet se çfarë ndodhte jashtë vendit. Më pas, situata ndryshoi dhe u ngritën dyshime mbi virusin nga zëra të ndryshëm dhe këto ndikuan negativisht te qytetarët për të mos zbatuar rregullat”, u shpeh ai.
Brataj ishte një ndër personat që u infektua me Covid-19, mirëpo pas izolimit dhe përkujdesit, arriti ta mposhtë duke u kthyer sërish në krye të detyrës.
