Një gënjeshtër mund të të kushtojë shtrenjtë!
Mjafton një e tillë dhe mund të ndryshojë gjithçka, por ajo të dalë sheshit, të gjitha të vërtetat e tua do të kenë pikëpyetje.
Historia që do të sjellim sot flet për jetën e Elvirës (Marina Hands), nënë e tre fëmijëve, e cila thotë një gënjeshtër vërtet të rëndë, me kusht që të fitojë vëmendjen dhe vlerësimin e familjes së saj.
“Mythomaniac” quhet seriali francez me 6 seri, që nuk është gjë tjetër veçse një pasqyrë e shumë familjeve të tjera që përballen me probleme tradhtie, vetmie, mosbindjeje, mungesë dashurie etj.
E lodhur nga familja e saj që e trajton si një shërbyese dhe me dyshime që partneri i saj e tradhton, Elvira sajon një gënjeshtër të tmerrshme dhe thotë që vuan nga kanceri i gjirit.
Mjaftoi një gënjeshtër dhe jeta e saj ndryshon në mënyrë dramatike për mirë, por rrjeta e ndërlikuar e mashtrimeve përreth saj dhe familjes, shpaloset dhe sjell me vete një mori sfidash të reja, të vështira për t’u kapërcyer.
A mund ta duash dikë që gënjen?
Gënjeshtrat e Elvirës për shëndetin e saj janë të ekzagjeruara, veçanërisht kur shohim 3 fëmijët e saj të vuajnë për nënën e tyre të sëmurë. Por sërish ajo na bën të ndjejmë simpati për të dhe trishtim në të njëjtën kohë. Edhe pse Elvira nuk ka si qëllim të lëndojë askënd, rruga që ka zgjedhur e çon në mënyrë të pashmangshme drejt vuajtjeve.
“Sa më shumë e sëmurë isha, aq më mirë më trajtonit- ishte sikur diçka kishte ardhur për të shpëtuar familjen tonë”, thotë ajo në trailerin e serialit.
Në një intervistë shkrimtarja Anne Berest shpjegoi se gënjeshtrat burojnë brenda familjes.
Lodhja mendore dhe fizike bie plotësisht mbi shpatullat e Elvirës. Ajo është gjithnjë shumë e sjellshme me të tjerët dhe nuk ia prish askujt, lë mënjanë nevojat e saj për t’i shërbyer familjes, shoqes së saj Isa (Julia Faure) së cilës i mban fëmijën, apo shefit në punë (Yves Jacques).
Dhe kur e gjithë kjo duket një barrë shumë e rëndë për të, një gungë e vogël në gjoks, do t’i duket shpëtimi më i madh.
Përgatituni për emocione të forta
Ndjenjat dhe emocionet janë pika më e fortë e serialit, pasi secili aktor ka një rol mjaft të vështirë për t’u realizuar. Në veçanti, Sam (Jeremy Gillet), djali i Elvirës, i cili jep një përshkrim vërtet prekës të një adoleshenti transeksual, që lufton për t’u përshtatur me jetën e tij në një familje jo edhe aq normale.
Në serial do të shohim edhe zhvillimin e personazhit të bashkëshortit të Elvirës, Patrick (Mathieu Demy), i cili ndjehet mjaft në faj për vuajtjet që i ka shkaktuar asaj, dhe heq dorë nga e dashura, për hir të familjes. Ai nis dhe i shpreh dashurinë në publik Elvirës, e bën atë të ndihet e dashuruar. Edhe pse kanë 3 fëmijë bashkë, ai më në fund vendos ta propozojë partneren për të lidhur kurorë me të, por çfarë do të ndodhë kur të mësojë të vërtetën?
“Mythomaniac” është një seriali mjaft origjinal, të kujton pak “Shtëpiaket e dëshpëruara”, me lagjet e pasura dhe familjet që kanë secila nga një sekret. Dhe dramat familjare janë ato që tërheqin sepse në fund të fundit, familja është kryesorja për të gjithë!
