Numri i viktimave nga Covid-19 në vendin tonë ka shkuar në 31, pasi pacienti me iniciale R.K. ka ndërruar jetë në spitalin “Shefqet Ndroqi”.
Ai ishte punonjës i Doganës Shqiptare dhe prej 2 javësh ndodhej në gjendje të rënduar shëndetësore.
Pavarësisht asistencës së ventilimit mekanik të respiracionit dhe mjekimit intensive, fatkeqësisht ai nuk ka mundur të mbijetojë.
Kolegët i kanë kushtuar një mesazh prekës viktimës, duke i shprehur ngushëllimete tyre familjarëve dhe miqve të të ndjerit, ndërsa Ministria e Shëndetësisë ende nuk ka reaguar.
Deri tani në vendin tonë janë infektuar 750 persona dhe janë shëruar 431 prej tyre.
Postimi i plotë:
Me dhimbje të madhe morëm njoftimin për humbjen e parakohëshme të kolegut tonë R.K, i cili prej ditësh ishte i shtruar në spitalin universitar “Shefqet Ndroqi, i konfirmuar me COVID 19.
Kolegu u nda nga jeta pasi prej dy javësh ishte në gjendje shumë të rëndë shëndetësore. Pavarësisht trajtimit të bërë nga stafi mjekësor, asistencës të ventilimit mekanik të respiracionit dhe mjekimit intensiv, kolegu nuk ka mundur të mbijetojë.
I gjithë stafi i Administratës Doganore Shqiptare i shpreh ngushëllimet më të sinqerta familjarëve dhe miqve të të ndjerit. Bashkohemi me dhimbjen tuaj! Të prehesh në paqe koleg!
Pavarësisht situatës së vështirë në të cilën po punojnë çdo ditë punonjësit e ADSH-së, ata janë në krye të detyrës 24 orë, në 7 ditë të javës, për të përmbushur me përkushtim dhe devotshmëri misionin e tyre, si në pikat e kalimit kufitar, ashtu edhe në shërbim të çdo qytetari apo biznesi në doganat e brendshme.
