Këtë javë qeveria do të miratojë amnistinë fiskale, ndërsa më pas do ta kalojë për diskutime në Kuvend me objektivin për ta kaluar projektligjin brenda muajit maj.
Kryeministri Edi Rama u shpreh sot në një njoftim për shtyp se kohëzgjatja e amnistisë parashikohet një vit me tre fasha 4-mujore. Edi Rama njoftoi se në fashën e parë detyrimi për të depozituar paratë do të jetë 5%, në të dytë 7% dhe në të tretën 10%.
Por çfarë është amnistia fiskale?
Me këtë nismë qytetarëve do t’ju falen të gjitha detyrimet e prapambetura si pasojë e mosdeklarimit të pasurisë së tyre, e vënë në këtë rast duke punuar në të zezë.
Ligjërisht mosdeklarimi i pasurisë është akt i veprës penale, pasi individi ka fshehur pasurinë dhe nuk ka paguar tatimin mbi të ardhurat, por me miratimin e saj kjo nuk do të quhet një vepër penale.
Por për kë do të jetë amnistia?
Rama u shpreh se ajo do të jetë për mijëra qytetarë shqiptarë që kanë punuar për 30 vite në emigracion dhe nuk kanë mundur të depozitojnë kursimet e tyre për t’i ligjëruar.
Rama shtoi se nga amnistia, “përjashtohen të gjithë politikanët, zyrtarët e lartë bashkë me rrethin e tyre familjar dhe të gjithë ata që militojnë në radhët e policisë së shtetit, të gjykatësve, prokurorëve apo në radhët e rangjeve të larta të administratës”.
Ndërkohë, më 27 prill do të hapet blloku i dytë i bizneseve, gjithnjë mbi bazën e rregullave dhe protokolleve të caktuara për të respektuar masat kundër COVID-19.
“Të hënë më 27 prill hapet blloku tjetër i bizneseve, me protokolle të caktuara. Dua të analizojë dhe është shumë e rëndësishme është se protokollet duhen lexuar dhe zbatuar, pasi hapja vjen me risk. Ne kemi mjete penalizuese, duke përfshirë edhe masat e reja të Kodit Penal që hyn në fuqi këto ditë, por fillimisht duhet të mendojnë për veten jo ndëshkimet. Duke mbrojtur njëri-tjetrin atëherë mund të hapemi.
Hapja në të gjithë botën është një proces gradual dhe askush nuk e di si do të shkojnë gjërat. Të gjithë janë të përgatitur për t’u tërhequr nëse dinamika e epidemisë kap nivele negative”, tha Rama.
/Iconstyle.al
