Ndërkohë që kryeminsitri Edi Rama u shpreh se nuk është detyra e qeverisë të financojë ecurinë e mediave në vend të cilat i cilësoi “humoristë”, gazetarët në Greqi do të përfshihen në paketën e fundit mbështetëse nga qeveria pas krizës së koronavirusit.
BalkanWeb shkruan se me një shtesë në aktin normativ, gazetarët e punësuar në median elektronike me mbi 5 punonjës, do të përfshihen në asistencën speciale për të gjithë të punësuarit në biznese me xhiro të ulët, në rastin konkret nga mungesa e reklamave.
“Paralelisht, gazetarët që nuk kanë kontratë të plotë pune por ushtrojnë profesionin si free lancer, domethënë privatisht, duke paguar sigurimet shoqërore me numër NIPT aktiviteti privat, do të përfshihen gjithashtu në këtë asistencë 800 euro, për dy javët e marsit dhe gjithë prillin”, thuhet më tej.
Ndërkohë, Top Channel shkruan se stafi teknik dhe gazetarët e terrenit në Greqi, të cilët janë në marrëdhënie pune të pandërprerë dhe vazhdojnë raportimet e tyre në terren, do të paguhen normalisht prej punëdhënësve të tyre.
Nga kjo paketë përfitojnë njerëzit që janë pa punë qoftë sepse punëdhënësit e tyre ishin të detyruar të mbyllnin biznesin e tyre nga qeveria ose sepse kontratat e tyre ishin pezulluar nga ndërmarrjet e dëmtuara nga pandemia.
Gjashtë kategori të tjera (ekonomistë dhe kontabilistë, mjekë, avokatë dhe noterë, profesionistë të arsimit, studiues dhe shkencëtarë të pavarur), të cilat kanë të drejtë për një shtesë prej 600 eurosh për programe trajnimi, gjithashtu do të jenë në gjendje të aplikojnë për ndihmën 800 euroshe.
Kjo asistencë nuk taksohet, ndërsa shoqërohet me mbulim të plotë të sigurimeve shoqërore si dhe shtyrje të afateve tatimore e kreditore për 4 muaj.
Ndërkohë, në planin financiar për përballimin e krizës së shkaktuar nga koronavirusi në Shqipëri, qeveria nuk ka parashikuar asnjë ndihmë për mediat.
Thirrjet e mediave, përfshi atë të përsëritur të iconstyle.al (lexo këtu), reagimin e Shoqatës së Gazetarëve Europianë, apo Unionit të Gazetarëve, deri tani kanë rënë në vesh të shurdhër.
“Përsa i përket mediave, unë mendoj që nuk është detyra e qeverisë të financojë ecurinë e programeve komerciale. Detyra e qeverisë është që të garantojë minimumin jetik të medias përsa i përket lirisë së informacionit dhe të drejtës për informim”, u shpreh Rama më herët.
Burimi: Balkan Web
