Është shënuar viktima e katërt nga koronavirusi në Kosovë. Një 65-vjeçar nga Ferizaj ka ndërruar jetë nga arresti kardiak, dhe më pas në analiza ka rezultuar se vuante nga COVID-19.
“I.SH ( 1955), i transferuar nga Spitali i Përgjithshëm në Ferizaj, ka ardhur në gjendje të rëndë shëndetësore dhe për shkak të arrestit kardiak, përkundër angazhimit maksimal nga stafi mjekësor i Klinikës Emergjente, ai nuk ka arritur të mbijetojë. I njëjti ka rezultuar pozitiv në COVID-19 pas testimit, post mortum”, thuhet në njoftim.
Instituti Kombëtar i Shëndetësisë Publike, ka njoftuar se janë konfirmuar edhe pesë raste të reja me COVID-19, duke e çuar në 170 numrin e personave të infektuar në vend.
Nga data 08.02.2020 deri më 07.04.2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 2.106 mostra të dyshimta në virusin SARS-CoV-2 dhe prej tyre, rezultojnë pozitive gjithsej 170 të infektuar, dhe 4 raste të vdekjes të cilët kanë pasur sëmundje të tjera shoqëruese.
Deri më sot janë kontaktuar dhe janë nën mbikëqyrje 3.304 kontakte të rasteve, shprehet ISHP.
Njoftimi i ISHP:
“Sot më 07.04.2020 në Laboratorin e Mikrobiologjisë Molekulare në IKSHPK me metodën RT-PCR, janë testuar 13 mostra të marra nga rastet e hospitalizuara në Klinikën Infektive. Nga mostrat e marra për testim në virusin SARS-CoV-2, pesë (5) prej tyre kanë rezultuar pozitive.
Rastet pozitive kanë kërkuar ndihmë në Klinikën emergjente, një prej të cilëve ka ardhur në gjendje të rëndë shëndetësore e që pas testimit ka rezultuar pozitiv. Një punëtor nga Malisheva dhe një nga Mitrovica.
Një pacient nga Gjilani po hulumtohen kontaktet dhe një laborant nga Gjakova”, thuhet në njoftim.
/Telegrafi
