Në një urdhër të firmosur sot më 1 prill nga ministrja e Shëndetësisë Ogerta Manastirliu, të gjitha institucionet arsimore do të qëndrojnë mbyllur deri në përfundim të gjendjes së epidemisë të shkaktuar nga infeksioni COVID-19.
Për shkak të situatës së koronavirusit, ministria ka vendosur që duke filluar nga çerdhet publike dhe jo publike të gjithë institucionet arsimore do të jenë të mbyllur pa afat të përcaktuar.
Ndonëse pritej që në 3 prill të vendosej një datë për rifillimin e procesit mësimor, rritja e numrit të të infektuarve në Shqipëri ka detyruar qeverinë të marrë këtë vendim.
Ndërkohë, mësimi do të vazhdojë të zhvillohet online dhe nxënësit mund të marrin nga aty informacionet e duhura.
Në vendin tonë janë konfirmuar 259 raste të prekur nga koronavirusi dhe për fat të keq 15 persona kanë ndërruar jetë.
Në dy javët e para të prillit pritet që përhapja e virusit të arrijë pikun.
