Korab Gjana është një prej infermierëve që iu bashkua 30 uniformave të bardha të nisura në Itali nga shteti shqiptar.
Ata do të shkojnë për të ndihmuar shtetin fqinj në një situatë kaq të vështirë dhe do të qëndrojnë atje për 1 muaj, ndërsa do të paguhen nga vendi ynë.
Gjana ka rrëfyer në një lidhje me Skype për “Faxweb” si është aktualisht situata në Itali, e cila duket se ka dalë jashtë kontrollit ditëve të fundit.
Infermieri tregoi se vijnë pafund ambulanca me të infektuar, ndërsa ata do të nisin punën nesër.
“Pacientët janë të panumërt. Vijnë pa fund helikopterë dhe ambulanca. Nesër do fillojmë dhënien e ndihmës tonë ndaj stafit italian. Ditën e parë u informuam mbi masat dhe gjendjen në të cilën ndodhet vendi përballë kësaj situate”- u shpreh Gjana.
Brenda 24 orëve të fundit, në Itali janë numëruar 756 jetë të humbura, ndërsa numri total i tyre ka shkuar në 10,779.
Gjithashtu, 97,689 persona janë konfirmuar pozitivë me covid-19.
