Minstrat e Vendeve të BE kanë rënë dakord për çeljen e negociatave me Shqipërinë dhe Maqedoninë e Veriut.
Lajmi është bërë i ditur nga Komisioneri për Zgjerim Oliver Varhely i cili ndërsa bën me dije vendimin e ministrave të BE, ka uruar me gjithë zemër të dyja vendet.
“Shumë i kënaqur që vendet anëtare të BE-së sot arritën marrëveshje politike për hapjen e bisedimeve të anëtarësimit me Shqipërinë dhe MV. Unë i uroj me gjithë zemër të dy vendet. Kjo gjithashtu dërgon një mesazh me zë të lartë dhe të qartë për ballkanin perëndimor: E ardhmja juaj është në BE”, thotë Varhely në njoftimin e tij.
Në këtë periudhë të vështirë, vendi ynë ka marrë dritën jeshile nga BE dhe në orën 15:30 pritet që kryeministri Edi Rama të japë më tepër detaje rreth këtij vendimi të rëndësishëm.
Ministri gjerman për Europën, Michael Roth, pak para video-konferencës, u shpreh se Ballkani Perëndimor është oborr i brendshëm brenda BE. Sipas tij, është në interes të përbashkët, që rajoni të gjejë qetësi dhe qëndrueshmëri.
“Ballkani Perëndimor nuk është një rajon i largët, por është oborri i brendshëm i Bashkimit Evropian. Është në interesin tone të përbashkët që ky rajon të gjejë qetësi, paqe, qëndrueshmëri dhe shtet juridik të përhershëm. Dhe unë jam shumë i lumtur që ne sot kemi mundësi të vëmë një sinjal të qartë që BE-ja i mban premtimet e saj dhe që perspektiva e anëtarësimit në Ballkan vlen për të gjitha vendet e Ballkanit Perëndimor”, u shpreh Michael Roth.
Franca dhe Holanda më në fund kanë pranuar të na japin një mundësi, pasi Komisioni Europian ndryshoi kriteret e pranimit.
